ძროხის ხორცის ცხარე სალათა ქინძით
ავტორი: „თბილისელები“ 12:00 21.07, 2021 წელი
საჭირო ინგრედიენტები: 300 გრამი ძროხის ხორცი, 1 თავი ხახვი, 1 ცალი სტაფილო, 1 ცალი კარტოფილი, 3 სადილის კოვზი სოიის სოუსი, 3 სადილის კოვზი ზეთი, 2 კბილი ნიორი, 1 სადილის კოვზი ვაშლის ძმარი, 1 ჩაის კოვზი შაქარი, 1 კონა ქინძი, შავი პილპილი, წითელი ცხარე წიწაკა, მარილი.
მომზადების წესი: ხორცი დაჭერით ბოჭკოს მიმართულებით, ვიწრო და გრძელ ჩხირებად. ცოტა დაბეგვეთ. ხახვი დაჭერით ძალიან თხლად და წვრილად. სტაფილო გახეხეთ გრძლად. გახეხეთ კარტოფილიც და შემდეგ მოხარშეთ. წყალი ცოტა მარილიანი უნდა იყოს. არ გადახარშოთ. გადაწურეთ და გადაავლეთ ცივი წყალი. ტაფაზე, ზეთში მოშუშეთ ხახვი და სტაფილო. მოაყარეთ კარტოფილს თასში.
ხორცი მოხრაკეთ ზეთიან ტაფაზე. კარგად უნდა დაიბრაწოს. მოასხით ერთი კოვზი სოიის სოუსი. მზად რომ იქნება, დაამატეთ ბოსტნეულს და აურიეთ.
ცალკე თასში ჩაასხით ზეთი. დაუმატეთ ძმარი, სოიის სოუსი, შაქარი. ცოტა შავი პილპილი, წითელი, ცხარე წიწაკა. გასრესილი ნიორი. მოასხით ეს სოუსი სალათას და ფრთხილად აურიეთ. სულ ბოლოს მოაყარეთ დაჭრილი ქინძი.
სიახლეები ამავე კატეგორიიდან