ბოსტნეულის სალათა ორაგულითა და ბრინჯით ნუცა შანშიაშვილისგან
ავტორი: „თბილისელები“ 12:00 25.03, 2021 წელი
ნუცა შანშიაშვილის კერძის რეცეპტი ,,თბილისელებისგან" 👇
მიყვარს ჩემთვის უცნობი და განსხვავებული კერძების დაგემოვნება. უპირატესობას ცოცხალ ბოსტნეულსა და ჯანსაღ კვებას ვანიჭებ. ვცდილობ, ორგანიზმი მძიმე საკვებით არ გადავტვირთო და ამით ზიანი არ მივაყენო. ასე წონაშიც არ ვიმატებ. ვერ ვიტყვი, გადასარევი კულინარი ვარ-მეთქი, თუმცა, რასაც მოვინდომებ, ვაკეთებ და გემრიელიც გამომდის. ზოგადად, მიმაჩნია, რომ ჯანსაღი და სწორი კვება, იმავდროულად, ვარჯიში და სუფთა ჰაერზე სიარული, ადამიანის ყოველდღიურობა და პრიორიტეტი უნდა იყოს. ახლა კი, გასწავლით, ბოსტნეულის საკმაოდ მსუბუქი და გემირელი სალათის მომზადებას ორაგულითა და ბრინჯით.
საჭირო ინგრედიენტები: 300 გრამი ორაგულის ფილე, 200 გრამი ბრინჯი, 200 გრამი ყაბაყი, 1 ცალი ლიმონის წვენი, ცოტა ბროწეულის მარცვლები, 2 ცალი ბოლოკი, 1 კვერცხი, ზეითუნის ზეთი, მაიონეზი, მარილი და პილპილი – გემოვნებით, ქინძი.
მომზადების წესი: ორაგულის ფილეს მოაყარეთ პილპილი და მარილი, მოასხით ლიმონის წვენი, ზეითუნის ზეთი და დაჭრილ ყაბაყთან ერთად აირღუმელში გამოაცხვეთ. მოხარშულ და გაცივებულ ბრინჯს დაუმატეთ პატარა ნაჭრებად დანაწევრებული თევზი, ყაბაყი და ბოლოკი, ასევე დაამატეთ ბროწეულის მარცვლები, დაჭრილი კვერცხი, მაიონეზი – გემოვნებით და კარგად ამოურიეთ. გააფორმეთ ქინძის ქორფა ფოთლებით.
სიახლეები ამავე კატეგორიიდან