ბადრიჯნის ტოლმა ნატა გულიაშვილისგან
ავტორი: „თბილისელები“ 12:00 09.09, 2021 წელი
სასწაულად გურმანი ვარ. ძალიან მიყვარს გემრიელი საჭმელები. უპირატესობას ხორცს ვანიჭებ. ალბათ, ეს ჩემი ჰოროსკოპის დამსახურებაც არის – „ლომი“ ვარ. თუმცა გემრიელ კერძებს ხორცითაც ვაკეთებ და ბოსტნეულითაც. ადრე, 5 წელი, ფიტნეს-ინსტრუქტორი ვიყავი. ანტალიაში და ეგვიპტეში ვატარებდი სტეპ-აერობიკას, აკვა-აერობიკას და იოგას. იმ პერიოდში ყველაფერს ვჭამდი და დიეტაზე ყოფნა არ მჭირდებოდა, რადგან დღეში 3 საათი ვარჯიშით ვიყავი დაკავებული. თბილისში რომ ჩამოვედი, ცოტა მოვდუნდი. აქ ვარჯიში მეზარება (იცინის), უფრო, ჯანსაღ კვებას მივმართავ. ვცდილობ, ნაკლები ცომეული ვჭამო, ვსვა ბევრი წყალი და დაძინებამდე 3 საათით ადრე არაფერი მივირთვა. ზოგადად, კერძის გემოსა და ვიზუალს ძალიან დიდი მნიშვნელობა აქვს, ასევე სუნსაც. შამფურზე შემწვარი მწვადი, ბროწეულისა და შავი ღვინის სოუსით, ყველაფერს მირჩევნია (იცინის). ახლა კი გასწავლით ბადრიჯნის ტოლმის რეცეპტს, რომელიც ამ სეზონზე საკმაოდ სასიამოვნო მისართმევია.
საჭირო ინგრედიენტები:
🔸 6 ცალი ბადრიჯანი
🔸 500 გრამი ხორცის შერეული ფარში
🔸 3 თავი ხახვი, 1 სტაფილო, 4 სუფრის კოვზი ოდნავ მოხარშული ბრინჯი
🔸 2 ჭიქა გახეხილი პომიდორი
🔸 2 კბილი დანაყული ნიორი, 1 კონა ქინძი, 1 კონა რეჰანი, ნახევარი კონა პიტნა, 1 ჩაის კოვზი ძირა
🔸 0,5 ჭიქა მდუღარე წყალი, ჭარხლის ფოთლები ქვაბში ჩასაფენად
🔸 მარილი და პილპილი კი – გემოვნებით, ზეთი.
მომზადების წესი 👩🍳
ბადრიჯნები ორად გაჭერით და გული ამოუღეთ. ხორცის ფარშს დაუმატეთ ნიორი, 1 თავი დაჭრილი ხახვი, ბრინჯი, ძირა, მარილი, პილპილი და წყალი. კარგად გადაურიეთ და ჩატენეთ ბადრიჯნებში. დანარჩენი ხახვი პომიდვრის პიურესთან ერთად მოშუშეთ ცოტა ზეთში, დაუმატეთ დაჭრილი მწვანილი. ქვაბში ჩააფინეთ ჭარხლის ფოთლები, ჩააწყვეთ ბადრიჯნები, დაასხით სოუსი და ხარშეთ ბრინჯის ბოლომდე მომზადებამდე.
გემრიელად მიირთვით!
სიახლეები ამავე კატეგორიიდან