არაჟანში ჩაშუშული ქათამი ტომატით მარიამ ციმინტიასგან
ავტორი: „თბილისელები“ 12:00 18.03, 2021 წელი
გემრიელი კერძის რეცეპტს მარიამ ციმინტია ,,თბილისელების" მკითხველს უზიარებს 👇
როცა გათხოვილი ვიყავი და ცალკე ვცხოვრობდით, მიყვარდა და მიწევდა კიდეც სამზარეულოში ტრიალი. შემდეგ დედასთან გადმოვედი საცხოვრებლად. დედა არაჩვეულებრივი მზარეულია, უგემრიელეს კერძებს ამზადებს და მე „დამჩრდილა“ (იცინის). თუმცა, მეც გემრიელი ხელი მაქვს, კარგად ვამზადებ ხორცეულსა და სოუსებს. თავადაც მიყვარს ხორცეული, განსაკუთრებით ქათმის გიჟი ვარ. თუმცა, როცა ენერგეტიკულად ორგანიზმის გაწმენდა მინდა, პერიოდულად, ვეგეტარიანულ კერძებს მივირთმევ. მიყვარს ქართული, იტალიური, უკრაინული და უნგრული სამზარეულო და კარგად გაფორმებული კერძები. ისეთ რეჟიმში მიწევს მუშაობა, დიეტის დაცვას ვერ ვახერხებ, თან, გურმანიც ვარ და მიყვარს გემრიელად დანაყრება. ეს ჩემს წონას და ვიზუალსაც ეტყობა, თუმცა, ხასიათზე მოვდივარ (იცინის). ცოტა შაქარსა და მარილს მოვიხმარ და დიდ ყურადღებას ვაქცევ ჯანსაღად კვებას. ახლა კი გასწავლით უგემრიელესი კერძის რეცეპტს – არაჟანში ჩაშუშული ქათამი ტომატით – საკმაოდ ადვილი მოსამზადებელია.
საჭირო ინგრედიენტები: 1 ქათამი, 400 გრამი არაჟანი, 5 სუფრის კოვზი ტომატი, 1 სუფრის კოვზი ფქვილი, 2 სუფრის კოვზი კარაქი, 2 თავი ხახვი, 1 კონა ქინძი, მარილი და წიწაკა – გემოვნებით.
მომზადების წესი: ქათამი დაჭერით პატარა ნაჭრებად. მოაყარეთ მარილი, ფქვილი და დაბრაწეთ ორივე მხრიდან კარაქში. შემდეგ, დააყარეთ ხახვი, დაასხით ცოტა წყალი და დაბალ ცეცხლზე, თავდახურული შუშეთ. ბოლოს, სრულ მომზადებამდე ცოტა ხნით ადრე დაასხით არაჟანი, ტომატი, დაამატეთ წიწაკა და გააგრძელეთ მოშუშვა. მზა კერძს მოაყარეთ დაჭრილი მწვანილი.
სიახლეები ამავე კატეგორიიდან
