ბედისწერის რა ნიშნებს გვიგზავნის საკუთარი სხეული

- სახე სხეულის მხოლოდ ნაწილი და საოცრად მგრძნობიარე ინსტრუმენტია, არა მხოლოდ ჩვენი ემოციების გამოსახატად, არამედ ბედისწერის ფარული მინიშნებების გადმოსაცემადაც. უძველესი დროიდან ამჩნევდნენ ადამიანები, რომ სახეზე უმცირესი ცვლილებაც კი - უეცარი წამოხურება, მსუბუქი ქავილი ან მოულოდნელი გამონაყარი - შეიძლება იყოს საიდუმლო შეტყობინება, ზეციური მინიშნება. მოდი, შევუდგეთ საინტერესო მოგზაურობას ხალხურ მინიშნებათა სამყაროში და ამოვხსნათ, რას „ჩაგვჩურჩულებენ“ ეს ძლივს შესამჩნევი, მაგრამ გამომსახველობითი სიგნალები.

- ლოყები ხშირად გამწითლებია უეცარი სიმხურვალისგან და ვიღაც გჭორავსო, უთქვამთ...

- როდესაც სახეზე მოულოდნელად წამოგახურებთ და ლოყები, ყოველგვარი მიზეზის გარეშე, გიწითლდებათ - ეს შემთხვევითი არ არის! ბრძენი წინაპრები ამ მოვლენას სხვათა ფიქრების გამოვლინებად მიიჩნევდნენ, ჩვენკენ განუსაზღვრელი მანძილისა და დროის გავლით რომ მოემართება. ახსნა კი ასეთია: თუ მარჯვენა ლოყა გიხურთ - ვიღაც სითბოთი და სინაზით გიხსენიებთ: ან გულაჩქროლებული ფარული თაყვანისმცემელია, ან - ძველი მეგობარი, რომლის კეთილი სიტყვები შორიდანაც გათბობთ. მარცხენა ლოყის წვისას, რომანტიკის დრო ნამდვილად არ არის. ვიღაც ზურგს უკან ავად ჩურჩულებს - გაღიზიანებულია ან თქვენი შურს. მაგრამ ნუ იდარდებთ - იქნებ ცვლილებათა ქარმა მოუბერა და მალე, ყველაფერ უსარგებლოს თან წაიღებს. ორივე ლოყის აწითლება - ცრემლს გიწინასწარმეტყველებთ. მაგრამ, იქნებ ეს დიდი ხნის ნანატრი შეხვედრით გამოწვეული ბედნიერების ცრემლებია, ან სულაც, მოულოდნელი სიხარული?! არსებობს ერთი უძველესი და ულამაზესი რიტუალი: აიღეთ ოქროს ბეჭედი (უმჯობესია, საქორწინო) და მსუბუქად გადაისვით გახურებულ ლოყაზე. თუ ბეჭედმა ღია, ძლივს შესამჩნევი კვალი დატოვა, თქვენზე ვიღაც სიყვარულითა და აღტაცებით ლაპარაკობს; ხოლო, თუ კვალი მუქია, ვიღაც არცთუ სასიამოვნოდ მოგიხსენიებთ.

- ყურების სიწითლე-სიმხურვალე რის მანიშნებელია?

- ყური ჩვენი მგრძნობიარე ანტენაა, რომელიც ათასობით კილომეტრის მანძილზეც კი იჭერს ხმადაბალ საუბარს. რაც შეეხება ამ ორგანოთა წვასა და აწითლებას, თუ მარჯვენა ყური გეწვით - გაქებენ: ან ბოსი აფასებს თქვენს ტალანტს კოლეგების წინაშე, ანდა, ვიღაც ანდობს მეგობრებს, რომ თქვენდამი ფარული სიმპათია აქვს. აი, მარცხენა ყური თუ გიხურთ: ვიღაც აშკარად უკმაყოფილოა და ემოციებს ვერ მალავს. თუმცა არ ინერვიულოთ - ჭორებს, შემოდგომის ფოთლებივით სწრაფადვე წაიღებს ქარი. გადავიდეთ თვალის ქავილზე, რაც ცრემლს ან უკონტროლო სიცილს ნიშნავს - ბედი ამ მინიშნებებს შეფარვით, სწორედ თვალის საშუალებით გვიგზავნის. ასე რომ, თვალების ქავილი ყოველთვის არ არის დაღლილობის ან ალერგიის ნიშანი - მარცხენა თვალის შემთხვევაში - კარგ ამბებს დაელოდეთ: დიდი ხნის ნანატრ შეხვედრას, მოულოდნელ საჩუქარს ან სასიამოვნო, გულისამაჩუყებელ სიურპრიზს; მარჯვენა თვალი კი - სამწუხაროდ, სევდის მაცნეა. მაგრამ ნუ იდარდებთ - ყველაზე მწარე ცრემლებიც კი, ბოლოს მაინც შრება.

- დროს თუ აქვს მნიშვნელობა ამ სასწაულების ასახდენად?

- თქვენ წარმოიდგინეთ და კვირის დღემაც კი, შეიძლება გიკარნახოთ: რას გპირდებათ აწითლებული სახე, მაგალითად, ორშაბათს და ეს არის — ახალი ნაცნობობა, რომელმაც შეიძლება შეცვალოს თქვენი ცხოვრება; სამშაბათს — ყურადღებით შეარჩიეთ სიტყვები, რომ საყვარელ ადამიანებთან ჩხუბს აარიდოთ თავი; ოთხშაბათს — გელით სასიამოვნო შეხვედრა, შესაძლოა, რომანტიკული პაემანი ან გულთბილი საუბარი ჩაის ფინჯანთან ერთად; ხუთშაბათს — წარმატება ბიზნესში, როცა სამუშაო ფულთან ერთად, ნამდვილი სიამოვნებაცაა; პარასკევს — მოულოდნელი ამბები, რომელმაც შეიძლება შეცვალოს თქვენი გეგმები; შაბათს — სიურპრიზი, რომელიც გაურკვევეია, სასიამოვნოა თუ - არა; კვირას — უდარდელი გართობა, სიცილი და თბილი შეხვედრები საყვარელ ადამიანებთან.

- გამიგია, სახეზე აკნეც (მუწუკი) კი, ბედისწერის გზავნილიაო...

- ყველაზე საძულველი მუწუკიც კი შეიძლება სამყაროს პატარა, მაგრამ მნიშვნელოვან გზავნილად იქცეს. თუ ცხვირზე გაქვთ — ვიღაც თქვენზეა შეყვარებული და შეიძლება, სწორედ ისაა, ადრე რომ არასდროს შეგიმჩნევიათ. შუბლზე ამოსული მუწუკი გამცნობთ, რომ სერიოზული გადაწყვეტილებების დრო დადგა და საბოლოოდ, დამსახურებული ჯილდოც გელოდებათ. აკნე ნიკაპზე კი - პირად ცხოვრებაში ცვლილებების მანიშნებელია - ახალ სიყვარულს შეხვდებით, ან კვლავ ძველი გრძნობები იფეთქებს.

- მაგრამ სიწითლე, თუ სახის რაიმეზე დარტყმამ, ტრავმამ გამოიწვია?

- ეს მხოლოდ შემთხვევითობა არ არის. მაგალითად, თუ შუბლი დაარტყით - მალე რთული, მაგრამ ძალიან მნიშვნელოვანი არჩევნის გაკეთება მოგიწევთ; ცხვირი - სიახლეებს ელოდეთ და შესაძლოა, მოულოდნელადაც გეწვიოთ; ლოყა - ურთიერთობისას მეტი სირბილე და თანაგრძნობა გამოიჩინეთ, რათა ზედმეტი კონფლიქტები თავიდან აიცილოთ. აქვე გეტყვით, რომ თუ ობობა პირდაპირ სახეზე დაგეცათ, პანიკაში ნუ ჩავარდებით - ეს კარგის ნიშანია. თუ საკუთარი ქსელის „თოკით“ დაეშვა თქვენს სახეზე - სასიხარულო ამბავს გაიგებთ; ხოლო თუ ზემოდან ჩამოვარდა - იღბალი უკვე კარზე გიკაკუნებთ, მოემზადეთ ბედნიერებისთვის!