საზოგადოება

მხატვარ დიმიტრი ხახუტაშვილის ნამუშევრები ილუსტრირებულ წიგნად გამოიცა

ავტორი: ეკა ტიკარაძე 14:18 10.08, 2022 წელი

გამოფენა
დაკოპირებულია

5 აგვისტოს, დიმიტრი შევარდნაძის სახელობის ეროვნულ გალერეაში წიგნის „დიმიტრი ხახუტაშვილი“ პრეზენტაცია გაიმართა.

წიგნი ცნობილი ქართველი მხატვრის 95-ე იუბილეს მიეძღვნა და მისი შემოქმედების სხვადასხვა ეტაპზე შექმნილი, კერძო კოლექციებში დაცული ნამუშევრების 300-ზე მეტი ილუსტრაციაა წარმოდგენილი.

„დღეს ჩვენთვის ძალიან სასიამოვნო იყო, გაგვემართა წიგნის პრეზენტაცია, რომელშიც შესულია არა მხოლოდ ის ნამუშევრები, რაც წარმოდგენილია გამოფენაზე, არამედ 300-ზე მეტი სხვადასხვა პერიოდში შექმნილი ნამუშევარი. წიგნში შესულია აგრეთვე მისი ოჯახის წევრების, კოლეგების, სტუდენტებისა და მეგობრების მოგონებები“, - განაცხადა პრეზენტაციაზე წიგნის ავტორმა, ლელა წიწუაშვილმა.

50-იანელთა თაობის მხატვრის შემოქმედების სრული სპექტრის ერთად წარმოჩენა, პროფესიონალებისთვისაც კი მოულოდნელი სიურპრიზი აღმოჩნდა - ათეულობით ფერწერული, გრაფიკული ნამუშევარი, წიგნის ილუსტრაციები და ესკიზები, რომელიც აქამდე თითქმის უცნობი იყო საზოგადოებისთვის.

აღსანიშნავია, რომ დიმიტრი ხახუტაშვილს, შემოქმედს, რომლის ნამუშევრებიც თითქმის ყველა ქართველისთვის ნაცნობია, არასდროს ჰქონია პერსონალური გამოფენა და მხოლოდ ახლახან, იუბილეზე დავით ტატულაშვილის უდიდესი ძალისხმევით მოხერხდა პირველი პერსონალური გამოფენის მოწყობა.

მხატვრის ნამუშევრების გამოფენა, ისევე როგორც წიგნის პუბლიკაცია, „შატო ზეგაანის“ ფინანსური მხარდაჭერით განხორციელდა.

„იშვიათია ხელოვანი, რომელმაც ამდენ მიმდინარეობაში - სიურეალიზმში, აბსტრაქტიზმში, რეალიზმში ერთნაირი წარმატებით შეძლო მოღვაწეობა. მისი სტილი, მისი ტექნიკა, მისი მთელი შემოქმედება ნამდვილად იმსახურებს იმას, რომ იყოს მეტად დაფასებული. წიგნი-ალბომი უაღრესად პროფესიონალურად, დახვეწილი გემოვნებით არის შესრულებული და უმაღლესი ხარისხით არის დაბეჭდილი“, - აღნიშნა გოჩა ჯავახიშვილმა, საგარეო საქმეთა სამინისტროს დიპლომატიური ინსტიტუტის უფროსმა მკვლევარმა.

სხვადასხვა ტექნიკასა და ჟანრში შესრულებული დიმიტრი ხახუტაშვილის შემოქმედებითი მემკვიდრეობა მართლაც მნიშვნელოვანი განაცხადია ქართულ მხატვრობაში. მისი კომპოზიციების გრაფიკულ-სტრუქტურული თვითმყოფადობა, კომპლექსური ხედვა ბატალური სცენების შექმნისას, თამამი და ღია ემოციური ხელწერა წარმოაჩენს დახვეწილი გემოვნებისა და საშემსრულებლო ტექნიკის მქონე, გამორჩეულად მოაზროვნე ხელოვანს, რომელიც მუდმივი ძიებითა და ექსპერიმენტებით იყო გატაცებული.

წიგნის დიზაინი ეკუთვნის დავით ჯანიაშვილს.

სიახლეები ამავე კატეგორიიდან

ახალი ნომერი - №13

18-24 მარტი

კვირის ყველაზე კითხვადი

კვირის ასტროლოგიური
პროგნოზი

კვირის დღეების ასტროპროგნოზი