მესამეკლასელებმა ყვავილების ტრადიციული დღესასწაული გააცოცხლეს

ქვემო ქართლში არიფანას გოგონები მართავდნენ, უმეტესად ზაფხულის დამდეგს, ამაღლების დღესასწაულის დროს. დილით ისინი მინდორში მიდიოდნენ, დაკრეფდნენ ყვავილებს და კონებად შეკრულს დებდნენ ქილაში, სადაც უმძრახად მოტანილი წყალი ესხა. შემდეგ სოფელში ჩამოივლიდნენ, ამ ყვავილებს ძროხების პატრონების ეზოებში გადააბნევდნენ და მღეროდნენ:

ჭია-ჭუა გადავყარე,

ვარდის კონა შემოვყარე,

ეს ზიზილა – თქვენ,

საღამოს რძე – თქვენ,

დილის რძე კი – ჩვენ...

ძროხების პატრონები ბავშვებს რძეს, კვერცხებსა და შაქარს აძლევდნენ. ახალგაზრდები ამით ტკბილ კორკოტს ხარშავდნენ და სუფრას ბუნებაში შლიდნენ.

ქართულის სახელმძღვანელოში საინფორმაციო ტექსტის გაცნობის შემდეგ მესამე კლასის მოსწავლეებს სურვილი გაუჩნდათ, გაეცოცხლებინათ ძველებური ტრადიცია და სკოლის ეზოში აღენიშნათ ყვავილების დღესასწაული. ისწავლეს გაზაფხულთან დაკავშირებული სიმღერები და ლექსები, გოგონებმა ქაღალდისაგან დაამზადეს ყვავილების გვირგვინები, ბიჭებმა – ფოთლების. მოიტანეს სასურველი სასუსნაო. მოირთვნენ გვირგვინებით და ისევე, როგორც ძველად, გავიდნენ სკოლის ეზოში, დასხდნენ მოლზე, იმღერეს, ლექსები წაიკითხეს, წაიხემსეს, იმხიარულეს და კმაყოფილები დაბრუნდნენ საკლასო ოთახში.