პორფირია – როგორ ამოვიცნოთ ეს დაავადება

ხშირად დაავადების გამოვლენა განსაზღვრული ფაქტორების ზემოქმედების შედეგია: ზედმეტი რკინის არსებობა ადამიანის ორგანიზმში, ალკოჰოლის ან ესტროგენის მოხმარება, ზოგიერთი მედიკამენტის ან ჰორმონის მიღება, თამბაქო; ჰეპატიტი, აივ ინფექცია, სტრესი, დიეტა, მზეზე დიდხანს წოლა.

არ გეგონოთ, ყველას, ვისაც კი პორფირიის გამომწვევი გენი აქვს, დაავადება ემართებოდეს. არსებობს ისეთი შემთხვევები, როდესაც ადამიანი ამ გენს ატარებს, მაგრამ არაფერს უჩივის. ამას ლატენტური პორფირია ეწოდება. მათ, ვისაც ნაკლებად გაუღიმა ბედმა და პორფირიის კანის ტიპი აღმოაჩნდა, აწუხებთ:

👉მზისადმი მომატებული მგრძნობელობა;

👉ბუშტუკები კანის მზისგან დაუცველ ნაწილზე;

👉კანის მზისგან დაუცველი ნაწილის ქავილი და შეშუპება.

მწვავე პორფირიის მქონე ავადმყოფები კი უჩივიან:

👉მუცლის ტკივილს;

👉გულმკერდის, კიდურების ან ზურგის ტკივილს;

👉გულისრევასა და ღებინებას;

👉ყაბზობას – მდგომარეობას, როდესაც ზრდასრულ ადამიანს კუჭის მოქმედება კვირაში სამზე ნაკლები აქვს, ხოლო ბავშვს – კვირაში ორზე ნაკლები;

👉დიარეას;

👉 შარდის შეკავებას – ბოლომდე ვერ ცვლიან შარდის ბუშტს;

👉 გონების დაბინდვას, ჰალუცინაციებს;

👉 გულყრებს, კუნთების სისუსტეს;

👉წითელ ან ყავისფერ შარდს.

მწვავე პორფირიის სიმპტომები სწრაფად, რამდენიმე საათში ან დღეში ვითარდება, რამდენიმე დღეს ან კვირას გასტანს და ავადმყოფს დროდადრო მერეც შეახსენებს ხოლმე თავს, კანის პორფირია კი უფრო მეტხანს გრძელდება.

პორფირია საკმაოდ სერიოზული დაავადება. არასათანადო ან დაგვიანებული მკურნალობის შემთხვევაში მოსალოდნელია გართულებები: დეჰიდრატაცია, თირკმლის ქრონიკული უკმარისობა, სისხლის მაღალი წნევა, ღვიძლის დაზიანება, კანის პერმანენტული დაზიანება. ვისაც მწვავე პორფირია აქვს, უხვად უნდა მიიღოს ნახშირწყლებით მდიდარი საკვები.