სტალინი ფინეთთან მოგებულ ომს წაგებულად მიიჩნევდა

– რაო, მარშალო ვოროშილოვ, აქ მოსვლის წინ ცარცი წაისვი სახეზე?

ვოროშილოვი კიდევ უფრო გაფითრდა, სიტყვა ვერ დაძრა და მხოლოდ თავი გააქნია. სტალინმა კი გაამწვავა:

– სახეზე ისეთი თეთრი ხარ, როგორც ფინური თოვლი. რა თავს აქნევ, სიტყვას ვერ ძრავ?

ვოროშილოვმა მთელი ძალები მოიკრიბა და მიუგო:

– ვერა, „კობა“...

– იმიტომ ხომ არა, რომ ოფიციალურად მოგებულ ომში ფინეთმა 25 ათასი, ხოლო ჩვენ კი ათჯერ მეტი მებრძოლი დავკარგეთ? თქვი, გისმენ, – უთხრა სტალინმა კლიმს.

– ფინელები დიდი თავგანწირვით იბრძოდნენ, კობა. არც ჩვენ ვაკლებდით, მაგრამ ყინვამ და მოულოდნელობამ თავისი ქნა, – თქვა ვოროშილოვმა.

შემდგომ სტალინმა ვოროშილოვის მიმართ ისეთი სიტყვები გამოიყენა, რაც მისგან არც მანამდე და არც შემდეგ არ მსმენია. ამ სიტყვებს სტალინი ხან რუსულად წარმოთქვამდა, ხან ქართულად. თან, ბერიას მრავალმნიშვნელოვნად გადახედავდა ხოლმე. ვოროშილოვი ნირწამხდარი იდგა და მუხლები ეკეცებოდა. სტალინმა პაუზა გააკეთა და ბერიას ქართულად უთხრა, რაც ყველასთვის გასაგები იყო:

– შენთან წაათრიე ეს უვიცი და ზედმიწევნით გამოიძიე, ვისი „შპიონიაო“.

სიტყვა „შპიონი“ სტალინმა შეგნებულად რუსულად თქვა. კლიმი აცახცახდა და თეთრზე თეთრი გახდა. ბერიამ კი სტალინს მუდარით უთხრა:

– ამხანაგო სტალინ, იქნებ, ამხანაგ ვოროშილოვს გამოსწორების შანსი მივცეთ. მართალია, მან დააშავა, მაგრამ ყველაფერი მისი ბრალი ხომ არაა.

მე მართალია, ქართული ცუდად მესმოდა, მაგრამ ყველაფერს მივხვდი და სტალინს ვუთხარი:

– კობა, გთხოვ, კლიმს შეუნდო. ლავრენტი პავლოვიჩი მართალია. ყველაფერი კლიმის ბრალი არ იყო და მიეცი გამოსწორების შანსი.

სტალინმა ანთებული თვალებით შემოგვხედა მე და ბერიას. შემდეგ ჩიბუხი დატენა და გააბოლა. ამ პროცედურამ 5 წუთს გასტანა. რადგან სტალინი ძალიან ნელა აკეთებდა ამას და აშკარა იყო, ფიქრობდა, რა ექნა. ბოლოს კი კლიმს ზურგი შეაქცია და მე და ბერიას გვითხრა:

– რადგან საკუთარ თავზე იღებთ კლიმის პასუხისმგებლობას, იყოს, როგორც თქვენ გსურთ. წავიდეს. იმუშაოს, მაგრამ ოდნავ მაინც რომ დაუცდეს ფეხი, სამივე პასუხს აგებთ.

ერთი სიტყვით, სტალინი დამშვიდდა და სამივე კაბინეტიდან დაგვითხოვა. როგორც კი მისაღებში გავედით, კლიმი მე და ბერიას მოგვიბრუნდა და ჩაგვეხუტა.“

სტალინმა ვოროშილოვი კიდევ ცოტა ხანს გააჩერა სამხედრო მინისტრის პოსტზე და სამხედრო რეფორმა დააწყებინა. შემდგომ კი მოხსნა თანამდებობიდან, მაგრამ აღარ შეურისხავს. თუმცა, ძალზედ ხშირად ახსენებდა ხოლმე ფინურ ბატალიებს.“