სადღესასწაულო და პიკანტური სალათა მარიტა როხვაძისგან
ავტორი: „თბილისელები“ 12:00 27.01, 2022 წელი
საყვარელი კერძის რეცეპტს მარიტა როხვაძე ,,თბილისელებს" უზიარებს 👇
სასწაული ხელი მაქვს, რასაც ვამზადებ, ყველაფერი უგემრიელესი გამომდის. ამავდროულად, გურმანიც ვარ, სასწაულად მიყვარს ჭამა. მიყვარს ხორცი, რძის ნაწარმი და ყველაფერი, რაც გემრიელია. ზოგადად, არ ვიცი და არ გამომდისო, არცერთმა ადამიანმა არ უნდა თქვას. სცადე და თუ პირველ ჯერზე არა, მეორე ცდაზე აუცილებლად გამოგივა. ახლა კი ჟურნალ „თბილისელების“ ერთგულ მკითხველს, შევთავაზებ პიკანტური, უმარტივესი სადღესასწაულო სალათის მომზადებას, რომელიც უცხოცაა და თან გემრიელიც.
საჭირო ინგრედიენტები:
🔸 200 გრამი ქამა სოკო
🔸 300 გრამი ქათმის ფილე
🔸 150 გრამი არაჟანი
🔸 100 გრამი გახეხილი ყველი
🔸 3 კვერცხი, 1 ქილა დაკონსერვებული ანანასი
🔸 1 თავი ხახვი, მაიონეზი, ზეთი
🔸 მარილი – გემოვნებით
🔸 3 კივი და სალათის ფურცლები – მოსართავად.
მომზადების წესი 👩🍳
სოკო და ხახვი დაჭერით, მოშუშეთ და დაუმატეთ არაჟანი. გააგრილეთ და გადაიტანეთ სასალათეში, რომელზეც მოლაგებულია სალათის ფურცლები. ქათმის ფილე მოხარშეთ მარილწყალში, გააგრილეთ და დაჭერით პატარა ნაჭრებად. დაუმატეთ მოშუშულ სოკოსა და ხახვს მეორე ფენად და მოასხით მაიონეზი. მოხარშული კვერცხი გახეხეთ მსხვილად, ისიც სასალათეში გადაიტანეთ და მაიონეზი მოასხით. დაჭერით ანანასი პატარა კუბიკებად, დაუმატეთ სალათას შემდეგ ფენად და მასაც წაუსვით მაიონეზი. ბოლო ფენა გახეხილი ყველია, ზემოდან კი – ისევ მაიონეზი. მორთეთ კივის ნაჭრებით.
სიახლეები ამავე კატეგორიიდან