პიკანტური პიცა
ავტორი: „თბილისელები“ 12:00 18.05, 2021 წელი
გემრიელი რეცეპტები „თბილისელებისგან“:
საჭირო ინგრედიენტები: 500 გრამი ფქვილი, 1 პატარა შეკვრა საფუარი, ცოტა მარილი, 1 სადილის კოვზი თაფლი, 300 მილილიტრი წყალი, 2 სადილის კოვზი ზეითუნის ზეთი, 150 გრამი მოცარელა ან სულგუნი, 60 გრამი მაგარი, ფხვიერი ყველი.
სოუსი: 3 სადილის კოვზი ზეითუნის ზეთი, 1 თავი ხახვი, 7 200 გრამი პომიდორი, 2 კბილი ნიორი, 1 კონა რეჰანი, მარილი, შავი პილპილი.
პიცის ცომის მომზადება: თასში ჩაასხით წყალი, შეურიეთ თაფლი, 1 სადილის კოვზი ზეთი და აურიეთ კარგად. გაითვალისწინეთ – წყალი საკმაოდ ცხელი უნდა იყოს. ჩაყარეთ საფუარი და ხელით აურიეთ. შემდეგ დააფარეთ ხელსახოცი. გააჩერეთ 7 წუთი თბილ ადგილას და ისევ აურიეთ.
მოზრდილ თასში ჩაყარეთ გაცრილი ფქვილი და შეურიეთ მარილი. გააკეთეთ ფქვილში ჩაღრმავება და ჩაასხით მასში საფუვრიანი მასა. მოზილეთ ცომი. გადაიტანეთ ზეთწასმულ მომინანქრებულ ჯამში, ფსკერზე კიდევ ჩაასხით ზეთი და გადააკარით ცელოფანი. გააჩერეთ თბილ ადგილას, სანამ ცომი ზომაში არ მოიმატებს.
მოამზადეთ სოუსი: წვრილად დაჭერით ხახვი და მოშუშეთ ზეთში. პომიდორს გადააცალეთ კანი, დაკეპეთ წვრილად. ჩაუმატეთ ხახვს და აურიეთ. დაუმატეთ წვრილად დაჭრილი ნიორი, მარილი, პილპილი და ადუღეთ ძალიან დაბალ ცეცხლზე. უნდა შესქელდეს. ამის შემდეგ ჩაუმატეთ წვრილად დაჭრილი რეჰანი.
ცომი გაყავით ორ ნაწილად. გააბრტყელეთ ერთი ნაწილი. დადეთ გამოსაცხობ, ზეთწასმულ ტაფაზე. ბლომად მოასხით პომიდვრის სოუსი. მოაყარეთ გახეხილი სულგუნი. გააბრტყელეთ ცომის მეორე ნაწილი და პიცას დააფარეთ. მის შუაში მოათავსეთ მომცრო ჭიქა, მის გარშემო კი პიცა სხივებივით ჩაჭერით. თითოეული ნაჭერი გადაგრიხეთ. მოაყარეთ დაფხვნილი, მაგარი ყველი და გამოაცხვეთ 200 გრადუსზე. 20 წუთის განმავლობაში.
სიახლეები ამავე კატეგორიიდან