კარტოფილის რულეტი ბეკონით
ავტორი: „თბილისელები“ 12:00 30.11, 2021 წელი
გემრიელი კარტოფილის რულეტის რეცეპტი ,,თბილისელებისგან" 👇
საჭირო ინგრედიენტები:
კარტოფილის ცომი – 600 გრამი კარტოფილი, 1 ჩაის ჭიქა ხორბლის ფქვილი, 1 სადილის კოვზი კარტოფილის ფქვილი, 1 კვერცხი, 1 კონა წვრილად დაჭრილი ოხრახუში, მარილი, პილპილი, მუსკატის კაკალი – გემოვნებით.
შიგთავსი: 100 გრამი ბეკონი, ნახევარი თავი ხახვი, კვერცხი, ცოტა წვრილად დაჭრილი ოხრახუში, ზეთი.
მომზადების წესი 👩🍳
კარტოფილი კარგად გარეცხეთ. მოხარშეთ. გააკეთეთ პიურე. ათქვიფეთ კვერცხი და ჩაყარეთ მასში ხორბლისა და კარტოფილის ფქვილი, პილპილი, მუსკატის კაკალი, მარილი, წვრილად დაჭრილი ოხრახუში. შეურიეთ ეს ყველაფერი კარტოფილის პიურეს და აურიეთ ძალიან კარგად.
შიგთავსისთვის – დაჭერით კვადრატებად ბეკონი, ხახვი – წვრილად და მოშუშეთ ცხელ ტაფაზე. თასში ჩანგლით გასრისეთ მოხარშული კვერცხი. დაუმატეთ მოშუშული ბეკონი და ხახვი, წვრილად დაჭრილი ოხრახუში და კარგად აურიეთ.
გასაბრტყელებელ დაფაზე გაშალეთ პერგამენტი. მოაყარეთ ცოტა ფქვილი. გააბრტყელეთ კარტოფილის ცომი. წაუსვით ზემოდან შიგთავსი. პერგამენტის დახმარებით გადაახვიეთ მჭიდროდ, რულეტივით და გადაიტანეთ გამოსაცხობ ტაფაზე. ზემოდან წაუსვით გათქვეფილი კვრეცხის გული და გამოაცხვეთ 180 გრადუსზე. 30-40 წუთში მზად იქნება.
გემრიელად მიირთვით!
სიახლეები ამავე კატეგორიიდან