დაკერებული „სამოსელი“

„ერთხელ გურამ დოჩანაშვილს ახალი შარვალი უყიდეს. ძალიან კარგი შარვალი იყო მაუდისა, მაგრამ გურამმა არ ჩაიცვა. - არაო, არ ჩავიცმევო. არც ამბობდა, რატომ. იკოხებოდა და შარვლის დანახვაც არ უნდოდა, არადა ძველი ძალიან შელახული იყო. ბოლოს როგორც იქნა დედას გაუტყდა. - ჩემს ამხანაგებს ყველას საკერებელდადებული შარვლები აცვიათ, მეც საკერებელი დამიდეთ და მაშინ ჩავიცმევო. დედა მიუხვდა გურამს, ადგა, ხელუხლებელ უკანებზე საკერებლები დაუდო. მაინც დაენანა ახალი შარვლის ამოჭრა. გურამმა რომ ნახა, ისევ იუარა. - მაინც არ ჩავიცმევო. ამოჭერი და ისე დაადე საკერებლებიო. დედა იძულებული გახდა, ამოეჭრა და ისე დაედო საკერებლები, თანაც ოდნავ სხვა ფერის, მაშინ კი ჩაიცვა გურამმა. გამოვიდა გარეთ, მოფარებულში მიდგა, მიჭმუჭ-მოჭმუჭნა, მიწიანი ხელიც გაუსვა და ისე გაიქცა ამხანაგებთან.“