მომღერალ გიორგი დათიაშვილის სიმღერები და კლიპები უზომოდ დიდი პოპულარობით რომ სარგებლობდა თინეიჯერებში, ეს ამბავი ყველას გადასარევად ახსოვს, თუმცა, მომღერალი ამ მხრივ, გარკვეული პერიოდია, ნაკლებად აქტიურობს – გიორგი უცხოეთში სწავლობს და სერიოზულად ფიქრობს მომავალზე. თუმცა, უკვე სამი წელია, მის ცხოვრებაში ის მთავარი ადამიანი გამოჩნდა, რომლისთვისაც ამდენს მღეროდა სიყვარულზე. გვანცა გადაბაძე მან თავის მეგობართან – გვანცას ბიძაშვილთან გაიცნო, გაცნობიდან სულ ცოტა ხანში მათი სიყვარული დაიწყო და, უკვე სამი წელია, ერთად არიან. 5 მაისს კი, რესტორანში „სამი საუკუნე” მათ გრანდიოზული ქორწილი გადაიხადეს. საკუთარი დიზაინით შეკერილ კაბაში პატარძალი ულამაზესი იყო. წყვილმა ჯვარი სიონში დაიწერა, ხოლო ხელის მოწერის ცერემონიალი რესტორანშივე გაიმართა. ნეფე-პატარძალმა ერთმანეთს სამუდამო სიყვარული მათთვის ძვირფასი ადამიანების გარემოცვაში შეჰფიცა. სტუმრებს შორის, ყველასთვის საყვარელი ჯეოსტარელებიც იყვნენ – ვაჟა მანია, გიორგი ცხვარიაშვილი, ლევან კბილაშვილი, სტუმრებთან ერთად, გიორგისა და გვანცას ბედნიერებას იზიარებდნენ. ჟურნალის სახელით ვულოცავთ წყვილს გაბედნიერებას და ვუსურვებთ, სიცოცხლის ბოლომდე ისე ჰყვარებოდეთ ერთმანეთი, როგორც ქორწილის დღეს!