უკანასკნელი 10 წლის განმავლობაში ინდოეთის მოსახლეობა 181 მილიონით გაიზარდა და ბოლო აღწერის შედეგების მიხედვით, 1,21 მილიარდს მიაღწია. ამ მაჩვენებლებით, ინდოეთი ძალიან მიუახლოვდა ჩინეთს, რომლის მოსახლეობა, უკანასკნელი მონაცემებით, ინდოეთისას მხოლოდ 120 მილიონი ადამიანით აჭარბებს.

მოსახლეობის აღწერა ინდოეთში ყოველ 10 წელიწადში ერთხელ ტარდება. ბოლო აღწერა 2010 წლის მიწურულს ჩატარდა, რომლის დროსაც 2,5 მილიონმა ჩინოვნიკმა მოინახულა ინდოეთის 7 ათასი ქალაქისა და 600 ათასი სოფლის ყოველი სახლი.

ინდოეთის ახლანდელი მოსახლეობა აჭარბებს ამერიკის შეერთებული შტატების, ინდონეზიის, ბრაზილიის, პაკისტანისა და ბანგლადეშის ერთად აღებულ მოსახლეობას. ამ ქვეყანაში ცხოვრობს პლანეტის მოსახლეობის 17,5 პროცენტი, მაშინ, როცა მასზე დედამიწის ტერიტორიის მხოლოდ 2 პროცენტი მოდის.