კითხვა: შარშან გადავიტანე პნევმონიით გართულებული ეგრეთ წოდებული „ღორის გრიპი“. არის თუ არა წლევანდელი ეპიდემიის დროს განმეორებით დაავადების საშიშროება თუ უკვე გამომიმუშავდა იმუნიტეტი?

პასუხი: ამ ვირუსის საწინააღმდეგო იმუნიტეტი გაქვთ, თუმცა ამ დაავადების სხვა შტამებისგან დაუცველი ხართ.

კითხვა: როგორ დავიცვათ ბავშვები გრიპისგან?

პასუხი: გრიპისგან დაცვის ერთადერთი რეალური საშუალება არის ვაქცინაცია. ახლაც არ არის გვიანი, ჩაუტაროთ ბავშვს ვაქცინაცია, რადგან აცრის შემდეგ ანტისხეულების ტიტრი ორგანიზმში გამომუშავდება 2 კვირის შემდეგ, ხოლო გრიპის სეზონი აპრილამდე გასტანს.

კითხვა: როგორ ვუმკურნალო I ტიპის შაქრიანი დიაბეტით დაავადებულ 7 წლის ბავშვს, რომელსაც აქვს მაღალი ტემპერატურა და ტაბლეტების მიღება იწვევს ღებინებას?

პასუხი: თუ ტაბლეტების მიღება იწვევს ღებინებას, საჭიროა მედიკამენტების ინიექციის სახით გამოყენება. ამისთვის კი მიმართეთ ექიმს.

კითხვა: მართალია თუ არა, რომ გრიპი ყოველთვის მწვავედ იწყება მაღალი სიცხით. მაქვს სურდო, ხველა, მაგრამ სიცხეს არ აუწევია. ეს გრიპია?

პასუხი: მწვავედ, ტემპერატურის მკვეთრი აწევით, იწყება მხოლოდ გრიპი, სხვა დანარჩენ მწვავე რესპირატორულ ვირუსულ ინფექციებს (200-ზე მეტი არსებობს) აქვს სხვადასხვა კლინიკური გამოვლინება, მათ შორის ისეთიც, რომელიც თქვენ დაასახელეთ. ყველა შემთხვევაში აუცილებელია ექიმის კონსულტაცია.

კითხვა: შეიძლება თუ არა ადამიანი იყოს გრიპის ვირუსის გადამტანი, თუ თვითონ არ არის ავად და რამდენ ხანს გრძელდება საინკუბაციო პერიოდი გრიპის დროს?

პასუხი: გრიპის დროს საინკუბაციო პერიოდი ძალიან ხანმოკლეა (1-2 დღე). თუ ადამიანი თვითონ არ არის დაავადებული, ის გადამტანიც ვერ იქნება, რადგან ვირუსი ჰაერწვეთოვანი გზით ვრცელდება.

კითხვა: გვირჩიეთ, რა მოვიმოქმედოთ გრიპის ან გაციების პირველივე სიმპტომების გამოვლენის დროს?

პასუხი: მკურნალობა სიმპტომატურია: სიცხის დამწევი პრეპარატები (თუ სიცხე 38,5 გრადუსზე მეტია), დიდი რაოდენობით სითხის მიღება (არანაკლებ 2 ლიტრისა) ინტოქსიკაციასთან საბრძოლველად. თუმცა, გართულებების თავიდან ასაცილებლად, ასევე, თუ დაავადება მძიმედ მიმდინარეობს, ან, როცა ხშირია ატიპური ან სხვა საშიში ვირუსული ინფექციები, აუცილებელია, მიმართოთ ექიმს.

კითხვა: მოქმედებს თუ არა ანტიდეპრესანტები პოტენციაზე?

პასუხი: ანტიდეპრესანტები შეიძლება გახდეს სქესობრივი დისფუნქციის მიზეზი (ნაადრევი ეაკულაცია, პოტენციის დაქვეითება და ასე შემდეგ). ეს გვერდითი მოვლენაა. ანტიდეპრესანტებს ნიშნავს ნევროლოგი, ფსიქიატრი ან ნევროპათოლოგი და შესაბამისი კონსულტაციებიც შეგიძლიათ, მათგან მიიღოთ.

კითხვა: რა სიმპტომები ახასიათებს ღორის გრიპს?

პასუხი: ამ ტიპის გრიპისთვის დამახასიათებელია: სიცხის უეცარი აწევა ძალიან მაღალ ნიშნულამდე, ციებ-ცხელება, კუნთებისა და ძვლების ტკივილი კატარალური მოვლენების პრაქტიკულად არარსებობის ფონზე.

რუბრიკას უძღვება ოჯახის ექიმი