მას შემდეგ, რაც „რედისონში“ ბრენდ „ანუკი ბაი ბიჭოლას” ჩვენება ვნახეთ, მეგობრების მიერ დაწყებულმა საქმემ კიდევ უფრო მეტად მიიღო ბიზნესის სახე და ეს ორი ბრენდი გაერთიანდა. ბიჭოლა და ანუკი არეშიძე ერთი სახელწოდების ქვეშ შექმნიან კოლექციებს და ერთად ეცდებიან მიიღონ მსოფლიო აღიარება. ამ მიმართულებით მათ უკვე ძალიან კონკრეტული, საინტერესო და მასშტაბური გეგმები აქვთ. ყველაზე ახლოს ბიჭოლასა და ანუკის კიევური ჩვენებაა. როგორც ცნობილია, ჩვენება 17 მარტს უმაღლეს დონეზე ჩაივლის, მას დაესწრებიან ქვეყნის ყველაზე ცნობილი სახეები, რომელთა შორის ფეხბურთელი ანდრეი შევჩენკოც იქნება. ჩვენებას მსოფლიო დონის ფეხბურთის ქართველი ვარსკვლავი კახი კალაძეც რომ დაესწრება, ამაში უცნაური არაფერია. ვფიქრობთ, ბრენდების გაერთიანების გადაწყვეტილება, ორივე მხარისთვის წარმატებული აღმოჩნდება და, „დევიდ კომასა“ და „თათა ნაკას” შემდეგ კიდევ ერთ, მსოფლიო მასშტაბის მოდის სახლს მივიღებთ.