კომპოზიტორ ნუგზარ თუშიშვილის მშვენიერ სიმღერაზე, რომელსაც დამწყები მომღერალი მარიამ გოგოჩიშვილი ასრულებს რეჟისორმა კობა ბრეგვაძემ გადაიღო კლიპი – „აფხაზეთის მზე”. კლიპში გამოყენებულია არც ისე დიდი ხნის წინ გადაღებული აფხაზეთის კადრები. გადაღებები ძირითადად ბათუმსა და თბილისში მიმდინარეობდა. პრეზენტაციაზე თემურ წიკლაურმა და ბესო კალანდაძემ კლიპს მაღალი შეფასება მისცეს. ლირიკული სიმღერა და სევდიანი კადრები კიდევ ერთხელ გვახსენებს აფხაზეთის მიწა-წყლის დაკარგვის ტკივილს. აფხაზეთში ომი 1992 წლის 14 აგვისტოს დაიწყო, მაგრამ ქართველი გმირების თავდადებამ ვერ უშველა წახდენილ საქმეს. 1993 წლის 27 სექტემბერს სოხუმი დაეცა. ოკუპირებული ტერიტორიიდან ათასობით დევნილი ვერ ივიწყებს საკუთარ მიწა-წყალს. ამ ტკივილს ვერც ერთი ქართველი ვერ ივიწყებს. ამიტომაც, ეს თემა კვლავ აქტუალურია ოცი წლის შემდეგაც.