შერილს ფული რად უნდა...
ცნობილი მომღერალი შერილ ტვიდი გამოტყდა, რომ დიდი ხანია ფულს არ ითვლის და წარმოდგენა არ აქვს, რამდენი უდევს ანგარიშზე. ლონდონის „ჩელსის“ მცველის, ეშლი კოულის ცოლი ამის შესახებ გასულ კვირას ბრიტანულ ტელევიზიაში ჟღურტულებდა.
„როცა საყიდლებზე მივდივარ, არანაირი მნიშვნელობა არ აქვს, რამდენს გადავიხდი ამა თუ იმ ნივთში. თუ რამე მომეწონა, მაშინვე ვყიდულობ ხოლმე. მაგალითად, წინა დღეს საათი და მაისური ვიყიდე. საათში 30 ათასი მივეცი, მაისურში კი სულ რაღაც 48 ფუნტი, მაგრამ, სახლში მივხვდი, რომ მაისური უფრო მომწონდა და უფრო ღირებულ შენაძენად ჩავთვალე“, – განაცხადა შერილმა.
იმის გათვალისწინებით, რომ კოულს კლუბში კვირაში 100 ათას გირვანქას უხდიან, ხოლო შერილი თავისი შემოქმედებით წლიურად ოთხ მილიონზე მეტს შოულობს, მისთვის ფულის დათვლის საჭიროება მართლა არ არსებობს.