უკრაინელი მოკრივეები, ძმები ვლადიმირ და ვიტალი კლიჩკოები, გერმანულ ფიტნეს-კლუბ „მაკფიტის” რეკლამის გამო გასუქდნენ. საუბარია სახალისო სარეკლამო რგოლზე, რომელშიც ძმებმა მიიღეს მონაწილეობა და რომლისთვისაც გრიმის საშუალებით კლიჩკოებს დიდი ზომის ღიპი და ღაბაბი გაუჩნდათ. რეკლამაში „გასუქებული” კლიჩკოები სხედან სკამზე, ჭამენ მაღალკალორიულ საკვებს და თვალს აყოლებენ გამხდარ და მომხიბვლელ ქერათმიან მანდილოსნებს. საინტერესოა, რომ კლიჩკოები 2008 წლიდან თანამშრომლობენ ფიტნეს-კლუბ „მაკფიტთან”, თუმცა, ადრინდელ სარეკლამო რგოლებში ისინი ფიტნეს-დარბაზში ვარჯიშობდნენ და ვარჯიშის პრინციპებს აცნობდნენ მაყურებელს. გარდა ფიტნეს-კლუბის რეკლამისა, კლიჩკოები იოგურტების, ცხვირსახოცების, შამპუნისა და ლუდის რეკლამირებასაც ეწევიან.