თუ გსურთ, დღის განმავლობაში იყოთ ენერგიული და ხალისიანი, უნდა მიაგნოთ თქვენი პოზიტივის წყაროს. ის კი, შეიძლება, არაერთი იპოვოთ:

1) როზმარინის, ბერგამოტის ან ციტრუსების სურნელი შესანიშნავი გამამხნევებელი საშუალებაა. ატარეთ თან პატარა ფლაკონით ზემოთ დასახელებული რომელიმე მცენარის არომატიზებული ზეთი და პერიოდულად დაყნოსეთ. შედეგს მომენტალურად იგრძნობთ.

2) მასაჟი შიაცუ უკვე გამოცდილი მეთოდია: 3-4 წამის განმავლობაში მონაცვლეობით დაიჭირეთ თითი ტუჩების ზემოთ და ქვემოთ (შუა მონაკვეთში), შემდეგ კი უცებ მოსწყვიტეთ დაჭერის ადგილს. თითოეულ წერტილზე დაჭერა გაიმეორეთ 8-10-ჯერ.

3) ზოგს ენერგიით ავსებს მწვანე ჩაი, ზოგს – ყავა, ზოგიერთი კი მატონიზებელ სასმელს ანიჭებს უპირატესობას. არჩევანი თქვენზეა – მიირთვით, რომელი სასმელიც უფრო გიყვართ, მაგრამ დაძინებამდე 2-3 საათით ადრე, რომ უძილობამ არ შეგაწუხოთ.

4) ყველასთვის ცნობილია დილის კონტრასტული შხაპის ჯადოსნური ძალა, მაგრამ თუ ამის დრო არ გაქვთ ან სხვა რამე გიშლით ხელს, მოუშვით ონკანში ცივი წყალი და 2-3 წუთით შეუშვირეთ ხელები მაჯებიდან იდაყვებამდე. პულსაციის ადგილი აუცილებლად უნდა მოახვედროთ წყლის ჭავლის ქვეშ.

5) სამკურნალო ეფექტი აქვს სპეციალურ ტრენაჟორს თავის კანისთვის – ის ერთგვარ წერტილოვან მასაჟს აკეთებს, რის შედეგადაც უმჯობესდება სისხლის მიმოქცევა ტვინში და რეგულირდება არტერიული წნევა.

6) აიძულეთ თავი, გააკეთოთ დილის გამამხნევებელი ვარჯიში, თუნდაც ლოგინში – ეს მხოლოდ 5-10 წუთს წაგართმევთ. სამაგიეროდ, მთელი დღის განმავლობაში არ იგრძნობთ დაღლილობას. დღისით შეეცადეთ, მეტი იაროთ ფეხით. თუ ისეთი სამსახური გაქვთ, რომ მთელი დღე ჯდომა გიწევთ, 2-3 საათში ერთხელ წამოდექით და ღია ფანჯარასთან თუნდაც რამდენიმე მსუბუქი ვარჯიში ჩაატარეთ, თან ღრმად ჩაისუნთქეთ. საღამოს მოციონი კი თქვენს დაღლილობას მთლიანად მოუღებს ბოლოს.