რას ნიშნავს ინგლისური ალიმენტი
ბრიტანელმა მოდელმა, ჯორდანის სახელით ცნობილმა ქეით პრაისმა, ამას წინათ თქვა, ჩემი ყოფილი ქმარი ავტობიოგრაფიას წერს და, რასაც ჩემზე წაიკითხავთ, მართალი არ იქნებაო. მისი ყოფილი ქმარი კი „მანჩესტერ იუნაიტედის“ ექსფორვარდი, დუაიტ იორკი გახლავთ. რაღა თქმა უნდა, ჟურნალისტები მაშინვე დუაიტთან გავარდნენ.
„არაფერი განსაკუთრებული არ დამიწერია. უბრალოდ, ჯორდანი მუდამ ამტკიცებს, რომ მე ჩვენი შვილის ალიმენტს არ ვიხდი, რაც ტყუილია. ის თვეში 1 300 ფუნტს ფულს არ ეძახის, სასამართლომ კი ზუსტად ამდენის გადახდა დამაკისრა. ამას გარდა, მთლიანად მე გადავიხადე ფული, რომელიც ჩემი შვილის სასკოლო განათლებას დასჭირდება და ეს თანხა 14 ათასი ფუნტია. მისი სადაზღვევო პოლისი 6 ათასი დამიჯდა. მისი ოთახიც მოვაწყვე და, ნებისმიერ დროს, როცა რამეს მთხოვს, ვყიდულობ. ჯორდანი კი მილიონებს ითხოვს და იმ მილიონებს ვერ მიიღებს“, – განაცხადა იორკმა.
ისე, კარიერის განმავლობაში იორკს დაახლოებით 25 მილიონი აქვს ნაშოვნი და, წესით, ათასებს არ უნდა ითვლიდეს.