ვიტამინების ნაკლებობა იწვევს იმუნიტეტის დაქვეითებას, ამიტომ ადამიანს პოლივიტამინური ნაყენების ხალხური რეცეპტები სიმხნევესაც მიანიჭებს და ტვინის მოქმედებასაც გაუაქტიურებს. ამასთანავე, აგიმაღლებთ ტონუსსაც და თქვენს გუნება-განწყობაზეც დადებითად აისახება.

გვირილის ნაყენი: ერთ სუფრის კოვზ გვირილის ყვავილს, რომელსაც აფთიაქში შეიძენთ, დაასხით ერთი ლიტრი ადუღებული წყალი და დადგით ნახევარი საათი. შემდეგ დაუმატეთ შაქარი, ნაღები გემოვნებით და მიირთვით. ეს ნაყენი ადამიანის ორგანიზმისთვის ძალიან სასარგებლო, ერთგვარი მკვებავი რამაა. ის ასევე, გამოგისწორებთ ძილის ხარისხს, თუ საღამოს, აბაზანის მიღების შემდეგ დალევთ.

კუნელის ნაყენი: ნახევარ ჩაის ჭიქა კუნელის ნაყოფს დაასხით ერთი ლიტრი ადუღებული წყალი. დადგით, დაახლოებით, ხუთი საათის განმავლობაში. ჭამის შემდეგ დალიეთ თაფლთან ან მურაბასთან ერთად.

ასკილის და ქიშმიშის ნაყენი: ქიშმიში კარგად დანაყეთ და დაასხით ადუღებული წყალი. დადგით ცეცხლზე და ადუღეთ ხუთი წუთით. ნახარში გადმოდგით და დაამატეთ ამავე რაოდენობის ასკილის ნახარში. დალიეთ ნახევარი ჩაის ჭიქა, დღეში რამდენჯერმე. ეს ნაყენი კარგია მათთვის, ვისაც გულ-სისხლძარღვთა დაავადებები აწუხებს. სხვათა შორის, ასკილიც და ქიშმიშიც გულის კუნთების გამაგრებას უწყობს ხელს.

მოცვის ნაყენი: ჭიქის ერთი მეოთხედი მოცვის დაქუცმაცებული ფოთლები ჩაყარეთ ჯამში და დაასხით სამი ჭიქა ცივი წყალი. დადგით ნელ ცეცხლზე და ადუღეთ ნახევარი საათი. შემდეგ გადმოიღეთ ცეცხლიდან და სვით თბილი ნაყენი დღეში 3-ჯერ, ჭამის შემდეგ. ეს ნაყენი პოლივიტამინების საბადოა.

ასკილის და მოცხარის ნაყენი: თანაბარი რაოდენობით შეურიეთ ერთმანეთში ასკილის ნაყოფი და შავი მოცხარის კენკრა. ორ სუფრის კოვზ ნარევს დაასხით ორი ჩაის ჭიქა მდუღარე წყალი და დადგით ერთი საათის განმავლობაში თავდახურული, ოთახის ტემპერატურაზე. შემდეგ გადაწურეთ და დაატკბეთ შაქრით. დალიეთ ნახევარი ჭიქა, დღეში სამჯერ. ეს ნაყენი კარგია გრიპის, გაციებისა და ინფექციური დაავადებების დროს.