გერეროს ბოთლი ოცი ათასი დაუჯდა
გერმანული „ჰამბურგის“ ფორვარდი პაულუ გერერო სადისციპლინო კომიტეტმა ხუთმატჩიანი დისკვალიფიკაციითა და ოციათასევროიანი ჯარიმით დასაჯა. საქმე „ჰანოვერთან“ მატჩის დროს მომხდარ ინციდენტს ეხება. ერთ-ერთმა გულშემატკივარმა გერეროს ტრიბუნებიდან დაუძახა, წაეთრიე შენს პერუშიო, რის შემდეგაც ფორვარდმა წყლის ბოთლი აიღო და გულშემატკივარს ესროლა. მართალია, მას ბოთლი მხოლოდ მხარში მოხვდა და არ დაუზიანებია, მაგრამ დისციპლინარებმა პერუელი არ დაინდეს და ხუთმატჩიან დისკვალიფიკაციასთან ერთად, 20 ათასი ევროს გადახდაც დააკისრეს.
„მომხდარს ძალიან ვნანობ და, მინდა, რომ იმ გულშემატკივარს პირადად შევხვდე და ბოდიში მოვუხადო“, – განაცხადა გერერომ, სასჯელს კი მაინც ვერ გადაურჩება, თუმცა, ისიც უნდა ითქვას, რომ მასთან შეხვედრის სურვილით არც დაზარალებული იწვის.