რის ანთებას იწვევს ძაღლებში დიდი ხნის დაგროვილი სეკრეტი და სწორი ნაწლავის ანთებითი პროცესები
თუ გყავთ ოთხფეხა მეგობარი, ისიც უნდა გახსოვდეთ, რომ ვეტერინართან აუცილებლად მაშინვე უნდა მიიყვანოთ, როგორც კი რაიმე პრობლემას შენიშნავთ. თუ რომელია ყველაზე ხშირი მიზეზი, რომლის გამოც ექიმს მიმართავენ, ამის შესახებ ვეტერინარი ზაქრო ბაჯიაშვილი გიამბობთ.
ზაქრო ბაჯიაშვილი: ერთ-ერთი ყველაზე გავრცელებული პროფილაქტიკური პროცედურა, რის გამოც მეპატრონეებს თავიანთი ცხოველი კლინიკაში მიჰყავთ, ეს არის პარაანალური ჯირკვლების სანაცია-გაწმენდა.
– მკითხველისთვის უფრო გასაგები რომ იყოს, იქნებ უფრო დაწვრილებით აგვიხსნათ ეს რას ნიშნავს?
– პარაანალური ჯირკვლები პატარა ქისისებრი ჯირკვლებია, განლაგებული ანალური ხვრელის ორივე მხარეს – როგორც მარჯვნივ, ისე მარცხნივ. ის გამოიმუშავებს სპეციფიკური სუნის სითხეს, რომელიც განასხვავებს მტაცებელს და განაპირობებს მის ინდივიდუალურობას. წესით, აღნიშნული ჯირკვლები, დეფეკაციის (კუჭში გასვლის) დროს გამოყოფენ თავიანთ სეკრეტს (ანუ რასაც ჯირკვალი გამოიმუშავებს), რაც ყველა ძაღლსა და კატაში არ ხდება. ამიტომაც არის საჭირო აღნიშნული პროცედურისთვის ექიმს მივმართოთ. აღნიშნული პროცედურის სახლში თვითნებურად ჩატარება არ ღირს, რადგან აღნიშნულ უბანში უხვადაა სისხლის ძარღვები და ნერვები. არასწორმა მანიპულაციამ კი შეიძლება, მათი დაზიანება გამოიწვიოს, რაც თავის მხრივ სერიოზულ გართულებამდე მიიყვანს ცხოველის ჯანმრთელობას. სეკრეტის დაგროვების ინტენსივობა და რაოდენობა მკაცრად ინდივიდუალურია და ძაღლის ორგანიზმზეა დამოკიდებული. ამიტომ, ექიმი, რომელიც ატარებს პროცედურას, აუცილებლად მიგითითებთ შემდეგი ვიზიტის დროს აღნიშნული პროცედურისთვის. დიდი ხნის დაგროვილი სეკრეტი, სწორი ნაწლავის ანთებითი პროცესები, ასევე სხვადასხვა დაავადებები, ალერგიები და ნივთიერებათა ცვლის მოშლილობა, იწვევს პარაანალური ჯირკვლების ანთებას.
– როგორ უნდა მივხვდეთ ანთების საწყისს? რა მაჩვენებლებით გამომჟღავნდება ის?
– პარაანალური ჯირკვლების ანთების ნიშნებია – ქავილი, მოუსვენრობა, მტკივნეულია კუდის მიდამოში შეხება. პარანალური ჯირკვლების ანთება ასევე იწვევს ბეწვის გაცვენას სხეულის უკანა ნაწილსა და უკანა კიდურებზე. თუ მეპატრონე მიაკითხავს ექიმს აღნიშნული დაავადების საწყის სტადიაზე, მაშინ მკურნალობა შემოიფარგლება მხოლოდ პარაანალური ჯირკვლების გაწმენდით, სპეციალური კათეტერის დახმარებით, ანუ, რეაქტიული გამორეცხვა ტარდება საანესთეზიო და ადგილობრივად მოქმედი საშუალებების გამოყენებით. აღნიშნული პროცედურები გრძელდება 5-7 დღე.
– თუ ცხოველი დაავადების საწყის ეტაპზე არ მივუყვანეთ ვეტერინარს, ამ შემთხვევაში რა შეიძლება, მოხდეს?
– სამწუხაროდ, თუ დაავადების საწყისი ეტაპი შეუმჩნეველი დარჩა, შეიძლება, ჩამოყალიბდეს პარაანალური ფისტულები, რომელიც ვითარდება ჯირკვლის შიგნით. მიმდინარე ჩირქოვანი პროცესის გამო სკდება ჯირკვლის კედელი და ზიანდება კანი, რაც საჭიროებს სასწრაფო ქირურგიულ ჩარევას. ვეტერინართან ვიზიტის დროს დადგინდება ჭრილობის და ფისტულის ზომა, გასუფთავდება ჩირქის, სისხლის კოლტების, ბეწვისა და ფეკალური მასებისგან. ვეტერინარი დაამუშავებს ანტისეპტიკური საშუალებებით, რექტალური სანთლებით, მალამოებით, სისტემური ანტიბიოტიკებით და მოაცილებს დაავადების გამომწვევ მიზეზს.
პარაანალური ჯირკვლების ანთებამ შეიძლება სერიოზული გართულებები გამოიწვიოს – დააზიანოს ორგანიზმის სხვა სისტემები, რისი მკურნალობაც უფრო რთულია.
– რა რჩევას მისცემთ ძაღლის მფლობელებს?
– თუ გყავთ ძაღლი და მასზე გული შეგტკივათ, დაიმახსოვრეთ, რომ მკურნალობასთან შედარებით, პროფილაქტიკა ყოველთვის იაფი ღირს. ამიტომ, თქვენი ოთხფეხა მეგობარი აუცილებლად დროულად მიიყვანეთ ვეტერინართან.