ვეტერინარის რჩევები
კითხვა: თუ შეიძლება, მითხარით რას ნიშნავს ლეიშმანიოზი და შესაძლოა თუ არა ის ზამთარშიც დაემართოს ძაღლს?
პასუხი: ლეიშმანიოზი არის ბუნებრივ კეროვანი ტრანსმისიული დაავადება, რომელსაც იწვევენ უმარტივესები ლეიშმანიები. ის გავრცელებულია სუბტროპიკულ და ტროპიკულ ქვეყნებში და მისი გადამტანები არიან მოსკიტები. არსებობს ორი სახის ლეიშმანიოზი: ვისცერალური, რომელიც აზიანებს რეტიკულუენდოთელიარულ სისტემას და კანის ლეიშმანიოზი. ძაღლები ავადდებიან უფრო ხშირად ვისცერალური ლეიშმანიოზით. მისი გადამტანი აქტიურია ზაფხულში მაგრამ, ინკუბაციის პერიოდი 6 თვემდე გრძელდება და ამიტომ, შეიძლება, ძაღლი ზაფხულში დასნებოვნდეს და კლინიკური ნიშნები ზამთარში გამოუვლინდეს.
კითხვა: სად და რა ასაკიდან შეიძლება ძაღლის გაწვრთნა პროფესიონალთან და რა დრო და რა თანხა დასჭირდება ამას?
პასუხი: ეს დამოკიდებულია იმაზე, თუ რა ჯიშისაა თქვენი ლეკვი. საერთოდ, გაწვრთნა იწყება 4-6 თვიდან, დრო და თანხა კი იმაზეა დამოკიდებული, რა გინდათ შეასწავლოთ ძაღლს, უფრო დაწვრილებითი ინფორმაციისთვის, უმჯობესია კინოლოგს მიმართოთ.
კითხვა: რა იწვევს ძაღლის ბეწვის ცვენას? რაიმე ვიტამინი ხომ არ დავალევინო? თუ ეს საჭიროა, რომელი ვიტამინი მივცე და რა სიხშირით?
პასუხი: შეიძლება, აღნიშნული პრობლემა ავიტამინოზის ბრალი იყოს, ან, თვალით უხილავი რომელიმე პარაზიტით იყოს გამოწვეული, რაც შეეხება ვიტამინებს, სასურველია მულტივიტამინის მიცემა, წელიწადში 2-ჯერ მაინც.
კითხვა: ჩემი ძაღლი ძალიან იფხანს ყურს, და თან წკმუტუნებს. რა შეიძლება ამის მიზეზი იყოს? ყურზე ხელს რომ ვკიდებ, ჭყაპაჭყუპის ხმა აქვს. შეიძლება, ბანაობის დროს ჩასვლოდა წყალი?
პასუხი: როგორც ჩანს, თქვენს ძაღლს ყურის ანთება აქვს, შეიძლება, გამოწვეული იყოს ბანაობისას წყლის ჩასვლითაც და სხვა მიზეზების გამოც. ჭყაპაჭყუპს რაც შეეხება, ეს ანთებითი ექსუდატია.
კითხვა: მყავს 10 თვის გერმანული ნაგაზი, ვცხოვრობ ბინაში. მაინტერესებს, დღეში რამდენჯერ უნდა გავიყვანო გარეთ და რამდენი ხნით?
პასუხი: სასურველია, თქვენი ძაღლი დღეში ორჯერ მაინც გაასეირნოთ, მინიმუმ, ერთი საათით.