გამოხდა თუ გამოხტა
ანუ, ცოდნადაწუნებული
თავდაპირველად, რფ-ის ხელმძღვანელობა გვაშინებდა, რომ საქართველოს ხელისუფლებას ხმას არ გასცემდა (სამართლიანობის გამო უნდა აღინიშნოს, რომ პირობასაც ასრულებდა), ახლახან კი ჩვენი პრეზიდენტი პერსონა ნონ-გრატადაც გამოაცხადა. გამომდინარე იქიდან, რომ რფ-ში ვიზიტის სურვილით (ყოველ შემთხვევაში, ერთი შეხედვით) არც ბ-ნი სააკაშვილი იწვის, უნდა ვივარაუდოთ, რომ ამ გამოცხადების გამო გული, მაინცდამაინც, არ სტკენია. პირიქითაც, რადგან საერთაშორისო მედიაში ამ თემის კომენტირების საშუალება მიეცა. ამის პარალელურად, გააქტიურდა საქართველოს ნომერ პირველი დიპლომატიც. ბ-ნმა ვაშაძემ რფ-ის პრეზიდენტს იურიდიული ტერმინების ცოდნა დაუწუნა და ხატოვნადაც შენიშნა, რფ-ში ვერ ისვენებენ და ესეც მორიგი „გამოხტომა“ იყოო. შესაბამისად, დაასკვნა, რომ ბ-ნ მედვედევს ხუთ წელს უმაღლეს სასწავლებელში სულ ტყუილად უსწავლია და, აქედან გამომდინარე, სახელმძღვანელოებში თავიდან ჩაღრმავებაც ურჩია. მეორე მხრივ, იმ შემთხვევაშიც კი, თუ ბ-ნი მედვედევი იურიდიულ ტერმინებში ვერ ერკვევა (რაც თავისთავად გულისხმობს, რომ შენიშვნის მიმცემი, ანუ ბ-ნი ვაშაძე ტერმინების უზადო მცოდნეა), ამას მისთვის ხელი არ შეუშლია, რომ ჩვენთვის მესამედი საქართველო აეცალა, რაც იმასაც ნიშნავს, რომ თავად ბ-ნ ვაშაძეს იურიდიული ტერმინების ცოდნა არაფერში გამოსდგომია. მეორე მხრივ, თუკი ბ-ნი მედვედევი იურიდიული ტერმინების უვიცობაშია შემჩნეული, საყველპურო ტერმინების ცოდნით, მაინცდამაინც, ვერც ჩვენი საგარეო საქმეთა მინისტრი დაიკვეხნის, რადგან, ბ-ნო გრიგოლ, გამოხდომა და არა – „გამოხტომა“.