სანდრო ჟორჟოლიანი 42 წლის იყო, როცა 23 წლით უმცროსი ქალი, ლამაზი ირინა ორეხოვსკაია შეირთო ცოლად. ირინა დედით ქართველი, მამით კი პოლონელი გახლდათ. ის პოლონეთში იყო დაბადებული, მაგრამ მერე ოჯახი საქართველოში გადმოსახლებულა და სანდრომაც თვალი დაადგა ლამაზ პიანისტ ქალს. ჟორჟოლიანმა ბრწყინვალედ იცოდა ფრანგული ენა, მან ის ჯერ კიდევ ოდესის უნივერსიტეტში შეისწავლა. ასე რომ, ახალგაზრდა ქალი მალევე მოიხიბლა მისი განათლებით. გაჩნდა დინარა ჟორჟოლიანი. ცოლ-ქმარი მალე გაშორდა. მაგრამ არც დინარას და არც შვილიშვილებს არ უგრძნიათ დისკომფორტი, რადგან სანდრომ და ირინამ ბოლომდე შეინარჩუნეს კარგი ურთიერთდამოკიდებულება. სანდრო ცოლყოფილთან ხშირად დადიოდა სადილად, შვილიშვილებსაც ანებივრებდა საჩუქრებით. ეუბნებოდა: რამდენ ხუთიანსაც მიიღებთ, იმდენ 5 მანეთს გაჩუქებთო და გოგონებიც ხშირად იმსახურებდნენ ნაჩუქარ ფულს. თუმცა, ზოგჯერ დღიურში თავად იწერდნენ გოგონები ხუთიანებს და სანდრო ბუზღუნებდა, რა ამბავია ამდენი ხუთიანი, სხვებსაც აცადეთ გაკვეთილების მოყოლაო.