№49 ექიმის რჩევები
კითხვა: მაინტერესებს პიტნა ბავშვის კვებაში როდიდან შეიძლება? მაგალითად, წვნიანში დამატება?პასუხი: იმ რაოდენობის პიტნა, რაც წვნიანს სჭირდება, ერთ წელზე უფროსი ასაკის ბავშვებისთვის ზიანის მომტანი არ იქნება.
კითხვა: მქონდა მუნი. მკურნალობა დერმატოლოგის მითითებით ჩავიტარე, თუმცა ცოტა ქავილი და გამონაყარი ისევ დამრჩა. მეორედაც ვიმკურნალე, მაგრამ გამონაყარი და ქავილი ისევ მაქვს. რას მირჩევთ?
პასუხი: შესაფასებლად დერმატოლოგს უნდა მიმართოთ, რადგან არ არის გამორიცხული, გქონდეთ მეორეული პიოდერმია – ქავილის შედეგად ხდება მეორეული ჩირქოვანი ინფექციის თანდართვა ან დერმატიტი, რაც მუნის საწინააღმდეგო პრეპარატებით მკურნალობის შემდეგ ვითარდება და კანის ანთებითი მოვლენები ახასიათებს. სწორი შეფასების გარეშე ეფექტური მკურნალობა ვერ დაინიშნება.
კითხვა: მაქვს ჩირქოვანი ყელი. აუცილებელია თუ არა გლანდების ოპერაცია?
პასუხი: საჭიროა, ყელი დაათვალიეროს ლარინგოლოგმა, ამის შემდეგ მიიღება გადაწყვეტილება მკურნალობის მეთოდზე.
კითხვა: მაქვს ტრიქომონიაზი. დაახლოებით რამდენი დრო სჭირდება განკურნებას? და მკურნალობის პროცესში სექსი რატომ არ შეიძლება კონდომით?
პასუხი: ტრიქომონიაზის მკურნალობა შესაძლოა, რამდენიმე დღიდან 1 თვემდე გაგრძელდეს, საშუალოდ – 2 კვირა. მკურნალობის მაქსიმალური შედეგის მისაღებად არ არის რეკომენდებული სქესობრივი კავშირი, თუნდაც კონდომით, დაინფიცირების რისკის გამო.
რუბრიკას უძღვება ოჯახის ექიმი
მაია ნუცუბიძე