№49 მოძღვარი გვირჩევს
კითხვა: გარკვეული მიზეზების გამო ჩემი გარდაცვლილი მშობლები სხვადასხვა ადგილზე არიან დაკრძალულები. ვინაიდან ძალიან მინდა, რომ მათი საფლავები ერთად იყოს, ვაპირებ, მამა დედასთან გადმოვასვენო. ამას ხომ არ ეწინააღმდეგება ქრისტიანული სარწმუნოება?
პასუხი: ერთი საფლავიდან მეორეზე მიცვალებულის გადასვენება აკრძალული არ არის, არც თქვენს სურვილშია რაიმე მიუღებელი. მოიქეცით ისე, როგორც გარემოება გიკარნახებთ.
კითხვა: როგორ უყურებს მართლმადიდებელი ეკლესია მიცვალებულის კრემაციას (დაწვას)?
პასუხი: ბიბლიური განჩინებით, ადამიანის ამქვეყნიური ყოფნის დასასრული ასეთია: „მიწა ხარ და მიწად იქეც!“ შესაბამისად, გარდაცვლილი მიწას უნდა მივაბაროთ. კრემაციის შემთხვევაში ცოლდვა მათ მოეკითხებათ, ვინც მიცვალებულის სხეულს დაწვავს, თავად გარდაცვლილს კი ეს ცოდვა არ მოეკითხება.
კითხვა: ოჯახში დაგვეწვა ღვთისმშობლის ხატი. ამ ფაქტმა ძალიან შეგვაშინა, ხომ არ მოასწავებს ეს რაიმე ცუდს?
პასუხი: ნუ დაუკავშირებთ ამ ფაქტს რაიმე უარყოფითს და ნუ გექნებათ ცუდის მოლოდინი. შესაძლოა, ეს შემთხვევით მოხდა. ადამიანის პირადი ცხოვრება დამოკიდებულია მის სწორ რელიგიურ-ეკლესიურ ცხოვრებაზე და ცრურწმენებს ნუ მიაქცევთ ყურადღებას.
კითხვა: ვიცი, რომ მოწყალების გაცემა უმნიშვნელოვანესია ადამიანის ცხოვრებაში. როგორ მოვიქცე, როდესაც არ მაქვს საშუალება, მოყვასს დავეხმარო?
პასუხი: წმიდა მამათა გადმოცემით, მოწყალების გაცემა მხოლოდ მატერიალურს არ გულისხმობს. თქვენ შეგიძლიათ, ტკბილი სიტყვითა და დალოცვითაც შეეწიოთ ადამიანს. მოყვასისადმი თანადგომა ქრისტიანისთვის დიდი ღვაწლია.
კითხვა: სიზმარში ვნახე უფალი. ცოტა დაბნეული ვარ, თან უზომოდ მიხარია. რას შეიძლება მოასწავებდეს ეს ხილვა?
პასუხი: სიზმრებთან მიმართებაში გამოიჩინეთ განსაკუთრებული სიფრთხილე და ნუ მიაქცევთ ყურადღებას, მით უმეტეს, ნუ მოუძებნით ახსნა-განმარტებას, რადგან შესაძლებელია არასწორი დასკვნები გამოიტანოთ, ან შესაძლოა ისიც, რომ ეს სიზმარი ბოროტი ძალისგან იყოს პროვოცირებული. ასეთ დროს ადამიანები ხიბლშიც ვარდებიან და ეს სახიფათოა. გირჩევთ, გათავისუფლდეთ ამ სიმძიმისგან.