№12 რათა ორი?!
მაშ რამდენი? ბევრი!
რაკი სურამის ფსიქიატრიულ დაწესებულებაში ვითარება სავალალოა, პრემიერ-მინისტრი დაგვპირდა, რომ, თქვენ წარმოიდგინეთ, ორ ახალ ფსიქიატრიული დაწესებულების აგვიშენებს!
გიორგი კვირიკაშვილმა შენიშნა, რომ ფსიქიატრიულ დაწესებულებებზე განსაკუთრებული კონტროლი უნდა დაწესდეს, რადგან იქ უმწეო ადამიანები ბინადრობენ და ამიტომაც სახელმწიფომ გულთან, ანუ ბიუჯეტთან, უფრო ახლოს უნდა მიიტანოს მათი პრობლემები.
ხოლო, რადგან გულთან დაახლოება გადაწყდა, ერთი ფსიქიატრიული დაწესებულება სამეგრელოში, მეორე კი კახეთში აღიმართება.
ინიციატივა მისასალმებელია, ვინაიდან ფსიქიატრიული დაწესებულების პაციენტები, მართლაც, რთულ პირობებში ცხოვრობენ, თუმცა, თუ ჩვენს სატელევიზიო და სოციალური ქსელების სივრცეს გადავხედავთ, ორი ფსიქიატრიული დაწესებულება აშკარად არასაკმარისია.
მეტიც, მე რომ მკითხოთ, ფსიქიატრიულს გარეთ მყოფნი (ანუ ფორმალურად ფსიქიკურად ჯანმრთელნი) იმდენად აგრესიულები არიან, ფსიქიატრიული დაწესებულებები ფორმალურად ფსიქიკურად არაჯანმრთელების მათგან იზოლაციის საშუალებაც იქნება.