№25 მრყეველი
ანუ ჩვენ, მკვლელები?!
თუმცა ახალიც აღარ ეთქმის და დიდი რყევებიც გამოიწვია ცივილიზებული მსოფლიოს დავარცხნილად შეშფოთებულ ცხოვრებაში, პუბლიკის გაკვირვებას მაინც ახერხებს (აშშ-ის პრეზიდენტ დონალდ ტრამპს ვგულისხმობ) და კიდეც განაგრძობს.
ჰოდა, რაკი განაგრძობს, Fox news-ის ჟურნალისტთან საუბრისას, რუსეთთან დიპურთიერთობის მოწესრიგებაც მსურს და ტერორიზმის წანააღმდეგ ერთობლივად ბრძოლაო, დნ. ტრამპმა ლამის პირად შეურაცხყოფად მიიღო ჟურნალისტის მიერ პრ. პუტინის მკვლელად მოხსენიება.
სახელდობრ, არგუმენტად დაასახელა: „ჩვენთანაც ბევრი მკვლელია. გგონიათ, ჩვენი ქვეყანაა უბიწო?!“
ოღონდ ის აღარ დაუკონკრეტებია, არიან თუ არა აშშ-ის პირველი პირები, მაინცდამაინც, მკვლელები.
მეორე მხრივ, ისეთი დრო დადგა, ლამის ორლეანელი ქალწულიც ვეღარაა უბიწო, თუმცა, თუ ჩვენი ოკეანისგაღმელი სტრატეგიული პარტნიორის პათოსს გავიხსენებთ, იმაზეც მადლობელი დავრჩებით, თუ კაბინეტში მთლად ჯეკი მფატრავის ფოტოს არ ჩამოიკიდებს.