კატალოგი
პოლიტიკა
ინტერვიუები
ამბები
საზოგადოება
მოდი, ვილაპარაკოთ
მოდა + დიზაინი
რელიგია
მედიცინა
სპორტი
კადრს მიღმა
კულინარია
ავტორჩევები
ბელადები
ბიზნესსიახლეები
გვარები
თემიდას სასწორი
იუმორი
კალეიდოსკოპი
ჰოროსკოპი და შეუცნობელი
კრიმინალი
რომანი და დეტექტივი
სახალისო ამბები
შოუბიზნესი
დაიჯესტი
ქალი და მამაკაცი
ისტორია
სხვადასხვა
ანონსი
არქივი
ნოემბერი 2020 (103)
ოქტომბერი 2020 (210)
სექტემბერი 2020 (204)
აგვისტო 2020 (249)
ივლისი 2020 (204)
ივნისი 2020 (249)

ცდუნება #20

ვერცხლი მისი არა მისცა აღსადგინებლად და ქრთამი უბრალოსა ზედა არა მოიღო, რომელმან ყოს ესე, იგი არა იძრას უკუნისამდე.
***
ოთო ხიდურელი, გამგებელმა ადმინისტრაციულ ერთეულში თავის წარმომადგენლად რომ დანიშნა, ხალხმა შვებით ამოისუნთქა, რადგან ყველამ იცოდა, წინამორბედისგან განსხვავებით, წესიერი კაცი იყო და მიუხედავად იმისა, ხუთი შვილი ჰყავდა და მატერიალურად არ ულხინდა, ქრთამზე იოლად არ წაუცდებოდა ხელი. ვინც ჯერ არ იცნობდა მის მტკიცე ხასიათს, თავიდან კი შესთავაზეს 500, 700, 1 000 ლარი, მაგრამ სულ წივილ-კივილით რომ გამოჰყარა კაბინეტიდან, მიხვდნენ, არაფერი გამოუვიდოდათ - „გიჟი ყოფილაო!”, თქვეს და შეეშვნენ.
მართალია, ხელფასი ოჯახს არ ჰყოფნიდა, ბავშვებს საკვები აკლდათ, ცოლი სულ დებილს და ჩლუნგს ეძახდა და გაყრით ემუქრებოდა, მაგრამ ოთოზე ეს არ მოქმედებდა და ჯიუტად იდგა აზრზე, რომ იოლად არ გაიყიდებოდა.
ახალი წელი ახლოვდებოდა, ორმა ფერმერმა რომ მიაკითხა კაბინეტში. მეცხოველეობის ფერმის გასაფართოებლად, სახელმწიფოს კუთვნილებაში არსებული რვა ჰექტარი სახნავ-სათესი მიწის ნაკვეთი სჭირდებოდათ, რაშიც 20 000 ლარს იხდიდნენ. იმ რაიონში, კვადრატული მეტრი მიწის სახელმწიფო ფასი 0,50 ლარი იყო. რადგან მიწა არსებული ბიზნესის გასაფართოებლად სჭირდებოდათ, შესაძლებელი იყო, პირდაპირი მიყიდვის წესით გადაეცა სახელმწიფო ფასში - 4 000 ლარად. ასეც გადაწყვიტა, მაგრამ არაფერი უპასუხა, მეორე დღისთვის დაიბარა.
მთელი ღამე ბორგავდა, ვერ დაიძინა - 16 000 ლარი საახალწლოდ ისე დარჩებოდა, შემდავებელიც არ ეყოლებოდა. ფიქრებში ახალი მანქანით დანავარდობდა.
***
– აბა, შენს ფრონტზე რა ხდებაო? – ჰკითხა შემცდენი დეპარტამენტის უფროსმა ტარტაროზმა მის წინ ატუზულ, კუდამოძუებულ, ინსტრუქტორ ჭინკას და ჩლიქში გარჭობილი სიგარეტი საფერფლეში ჩაბერტყა.
– 4 000-ლარიან საქმეში 20 000 ლარს სთავაზობენ. ახალი წელია, ფული სჭირდება, ალბათ, აიღებსო! – უპასუხა ჭინკამ და შექების მოლოდინში გაინაბა.
– ცოდოა ბიჭი, მაგისთვის არ მემეტებაო! – უთხრა ტარტაროზმა და ჩლიქით მარცხენა რქა მოიფხანა.
– მაშ რა ვქნაო? – გაკვირვებული შეაცქერდა ჭინკა.
– შეაგონე, რომ არ აიღოსო! – შეუღრინა ტარტაროზმა.
***
– უკეთუ თვალი შენი მარჯვენე გაცდუნებდეს შენ, აღმოიღე და განაგდე შენგან, რამეთუ უმჯობეს არს შენდა, რაითა წარწყმდეს ერთი ასოთა შენთაგანი, ვიდრე არა ყოველი გუამი შენი შთავარდეს გენიასა შინაო!
***
მეორე დღეს, ოთომ ფერმერებს მტკიცე უარი სტკიცა და დაბნეულები გაუშვა სახლში.
ფერმერებმა იფიქრეს, ალბათ ცოტა შევაძლიეთო. იმსჯელეს, ითათბირეს და მესამე დღეს 40 000 ლარით ხელდამშვენებულები მიადგნენ კაბინეტში. ისევ არაფერი უპასუხა, მეოთხე დღისთვის დაიბარა. მთელი ღამე ბორგავდა, ვერ დაიძინა - 36 000 ლარი საახალწლოდ ისე დარჩებოდა, შემდავებელიც არ ეყოლებოდა. ფიქრებში სოფელში ახალი სახლი აიშენა.
***
– აბა, შენს ფრონტზე რა ხდებაო? – ისევ ჰკითხა შემცდენი დეპარტამენტის უფროსმა ტარტაროზმა მის წინ ატუზულ, კუდამოძუებულ, ინსტრუქტორ ჭინკას.
– ის ქრთამი არ აიღო, მაგრამ 4 000- ლარიან საქმეში 40 000 ლარს სთავაზობენ. ახალი წელია, ფული სჭირდება, ალბათ, აიღებსო! – უპასუხა ჭინკამ და გუშინდელივით გაინაბა შექების მოლოდინში.
– ცოდოა ბიჭი, მაგისთვისაც არ მემეტებაო! - უთხრა ტარტაროზმა მარცხენა რქის ფხანით.
– მაშ რა ვქნაო? – გაკვირვებული შეაცქერდა ჭინკა.
– შეაგონე, რომ არ აიღოსო! – შეუღრინა ტარტაროზმა.
***
– უკეთუ მარჯუენა ხელი შენი გაცდუნებდეს შენ, მოიკვეთე იგი და განაგდე შენგან, რამეთუ უმჯობეს არს შენდა, რაითა წარწყმდეს ერთი ასოთა შენთაგანი, ვიდრე არა ყოველი გუამი შენი შთავარდეს გენიასა შინაო!
***
მეოთხე დღეს, ოთომ ფერმერებს ისევ მტკიცე უარი სტკიცა და დაბნეულები გაუშვა სახლში.
მეხუთე დღეს კითხვით მიადგნენ ფერმერები კაბინეტში:
– მაშინ, შენ გვითხარი, რამდენი გინდაო?
– 100 000 ლარზე ნაკლებს, ხელს არ მოვკიდებო! – უპასუხა ოთომ.
– მოვიფიქრებთ და პასუხისთვის ხვალ მოვალთო! – უთხრეს ფერმერებმა. მთელი ღამე ბორგავდა, ვერ დაიძინა – 96 000 ლარი საახალწლოდ ისე დარჩებოდა, შემდავებელიც არ ეყოლებოდა. ფიქრებში დედაქალაქში სამოთახიან ბინაში ცხოვრობდა.
***
– აბა, შენს ფრონტზე რა ხდებაო? – ისევ ჰკითხა შემცდენი დეპარტამენტის უფროსმა ტარტაროზმა მის წინ ატუზულ, კუდამოძუებულ, ინსტრუქტორ ჭინკას.
– ის ქრთამი არ აიღო, მაგრამ 4 000-ლარიან საქმეში 100 000 ლარი თვითონ მოსთხოვა, ოღონდ შეიძლება, ფერმერებმა არ მისცენო! – უპასუხა ჭინკამ და გუშინდელივით გაინაბა შექების მოლოდინში.
– ცოდოა ბიჭი, მაგისთვისაც არ მემეტებაო! – უთხრა ტარტაროზმა მარცხენა რქის ფხანით.
– მაშ რა ვქნაო? – გაკვირვებული შეაცქერდა ჭინკა.
– შეაგონე ფერმერები, რომ მისცენო! – შეუღრინა ტარტაროზმა.
***   
– მიეცით კეისარს კეისრისა და ღმერთს ღმრთისაო!
***
მეექვსე დღეს გამოართვა ოთომ ფერმერებს 100 000 ლარი, 4 000 ლარი – მიწის საფასური ბიუჯეტში გადაარიცხინა და კმაყოფილები გაუშვა სახლში.
***
– აბა, შენს ფრონტზე რა ხდებაო? – ისევ ჰკითხა შემცდენი დეპარტამენტის უფროსმა ტარტაროზმა მის წინ ატუზულ, კუდამოძუებულ, ინსტრუქტორ ჭინკას.
– 4 000-ლარიან საქმეში 100 000 ლარი ქრთამი აიღოო! – უპასუხა ჭინკამ და შექების მოლოდინში გაინაბა.
– ყოჩაღ შენ, ძვირად ღირებული სული ჩავიგდეთ ხელში, ახლა მაგას ეკლესიაც ვეღარ უშველისო! – უთხრა გახარებულმა ტარტაროზმა და ჩლიქით მარცხენა რქა მოიფხანა.

скачать dle 11.3