„მტრის ჯინაზე ვილოთავებ დღე და ღამე“

 წლის ბოლოს სულზე მოგვისწრო (მით უფრო, რომ მეორე ახალი წელიც გვაქვს გადასაგორებელი) ოქსფორდის უნივერსიტეტის ფსიქოლოგიისა და ევოლუციური ნეიროქირურგიის კვლევების ჯგუფის დასკვნამ!
კვლევითი ჯგუფის ხელმძღვანელმა ვინმე პატივცემულმა რობინ დანბარტმა გვაცნობა, რომ მამაკაცთათვის, სულ მცირე, კვირაში ორჯერ ოთხ მამაკაც მეგობართან ერთად დათრობა (ვვარაუდობ, უნდა იყოს არა დათრობა, არამედ შეზარხოშება) სასიცოცხლოდ აუცილებელია!
სასიცოცხლოდ აუცილებელი კი იმიტომ ყოფილა, რომ მამაკაცის ჯანმრთელობის შენარჩუნების ლამის ერთადერთი გზააო.
ასე განსაჯეთ – თუ ამ კვლევას ვერწმუნებით, ძლიერი მეგობრული კავშირის მქონე პირთა შორის კვირაში ორჯერ ალკოჰოლის ერთად მიღება, აძლიერებს იმუნურ სისტემას, აქრობს სტრესს, გამოყოფს ენდორფინებს და მეტიც – კიდეც აკეთილშობილებსო.
იმის გათვალისწინებით, რომ კვირაში მხოლოდ შვიდი დღეა, ოთხი კი, თურმე, ბახუსდარტყმულმა უნდა გაატარო (თუ მამაკაცი ხარ) და ამას დავუმატებთ, რომ აწ უკვე ამ ჩვენს ქვეყანაშიც თითქმის დეკრიმინალიზდა მარიხუანის მოხმარება, იმ დარჩენილ სამ დღესაც თუ დაბოლდებიან (მესამე პირში ვწერ, ვინაიდან ქალების შესახებ, ამ მიმართულებით, ჯერ კვლევები არ ჩატარებულა), ფაქტობრივად, ნირვანაში ვიცხოვრებთ და ისემც უქნიათ პუტინსა და ტრამპს ქვა-ქვაზე არ დაუტოვებიათ, მათ შორის, არც გადაუნაწილებელი. –