ანუ თვალყურდასაცავები

 რფ-ის „დუმამ“ საბოლოოდ დაამტკიცა კანონპროექტი, რის მიხედვითაც, ექსტრემიზმისკენ ინტერნეტით საჯარო მოწოდება პატიმრობას ითვალისწინებს და რფ-ის მოქალაქემ, შესაძლოა, არც მეტი, არც ნაკლები, ციხეში ხუთი წლით ამოყოს თავი.
ამისთვის კი სავსებით საკმარისია, თუ თქვენ – თქვენ რა, რუსეთის მოქალაქე გაიზიარებს ან „ლაიქს“ დაუსვამს შესაბამის პროვოკაციულ სტატუსს.
სტატუსის პროვოკაციულობას კი, ცხადია, იქ გაარკვევენ, სადაც ჯერ არს!
ბუნებრივია, ექსტრემიზმთან ბრძოლა ყველა სახელმწიფოს ვალია, თუმცა ზემოთქმული იმასაც ნიშნავს, რომ გამკაცრდება სოციალური ქსელების კონტროლიც. მეტიც, ამას ითვალისწინებს დამტკიცებული საკანონმდებლო ცვლილებებიც, მათ შორის, „მავნე ინფორმაციის“ წვდომის შეზღუდვას.
ხოლო, თუ გავითვალისწინებთ, რომ „ექსტრემისტულად“ შესაძლოა, მიიჩნიონ, მაგალითად, რფ-ში ხელისუფლების შეცვლის სცენარებიც, ვფიქრობ, ურიგო არ იქნება, თუკი რფ-ის მოქალაქეებს სიზმრებსაც გაუკონტროლებენ და „მავნე“ ფანტაზიებზე წვდომასაც აუკრძალავენ. –