ქიშმიშიანი კექსი
საჭირო ინგრედიენტები: 2 კილოგრამი ფქვილი, 300 გრამი ქიშმიში, 200 გრამი თხელ ფირფიტებად დაჭრილი ნუში, 750 გრამი შაქარი, 250 გრამი ნედლი საფუარი, 0,5 ლიტრი რძე, 200 გრამი ლიმონისა და ფორთოხლის ცუკატები, 750 გრამი კარაქი, 1 პატარა ჭიქა რომი, მწიკვი დაფქული ილი, მწიკვი მარილი, ნუშისა და ლიმონის ესენცია – გემოვნებით; დამატებით: 125 გრამი გამდნარი კარაქი და 250 გრამი შაქრის პუდრი.
მომზადების წესი: ქიშმიშს დაასხით ოთახის ტემპერატურის წყალი და დაალბეთ. ფქვილი, შაქარი და მარილი დიდ თასში მოათავსეთ. თბილ რძეში გახსენით საფუარი და გააჩერეთ 10 წუთი. კარაქი გაადნეთ და გააცივეთ. მშრალ ინგრედიენტებს შეურიეთ ჯერ კარაქი, შემდეგ რძისა და საფუარის მასა. დაუმატეთ ნუშისა და ლიმონის ესენციები და რომი. მოზილეთ ცომი, ჩადეთ თასში, ტილო გადააფარეთ და დადგით თბილ ადგილას, რომ აფუვდეს. აფუებულ ცომს შეაზილეთ ნუში, ცოტაოდენ ფქვილში არეული ცუკატები და ქიშმიში. ცომი ორად გაყავით, გუნდები დადეთ თუნუქის ფურცელზე და გააჩერეთ კიდევ 1 საათი, შემდეგ გამოაცხვეთ 180 გრადუსზე, დაახლოებით 1 საათის განმავლობაში. გამოცხობამდე ცოტა ხნით ადრე ნამცხვარს გადააფარეთ ფოლგა და ისე დაასრულეთ ცხობა. ცხელ-ცხელ კექსს მოასხით გამდნარი კარაქი და მოაყარეთ შაქრის პუდრი.