კარტოფილის რულეტი
საჭირო ინგრედიენტები: კარტოფილის ცომისთვის – 800 გრამი კარტოფილი, 75 გრამი მანანის ბურღული, 75 გრამი ახალგახეხილი პარმეზანი, 1 ცალი კვერცხი, 150 გრამი კარტოფილის სახამებელი, ცოტაოდენი პურის ფქვილი საფანელად, 60 გრამი კარაქი, 2-3 ღერი ოხრახუში, მარილი და ჯავზი გემოვნებით. გულსართისთვის: 1 კონა ოხრახუში, 1 კონა რეჰანი, 75 გრამი კედრის კაკალი, 75 გრამი თხილი, 40 გრამი გახეხილი პარმეზანი, მარილი, პილპილი – გემოვნებით.
პომიდვრის სალსისთვის: 500 გრამი პომიდორი, 1 თავი ხახვი, 0,5 კონა რეჰანი, 2 სადილის კოვზი ვაშლის ძმარი, 1 სადილის კოვზი ყავისფერი შაქარი, მარილი, ახალდაფქული შავი პილპილი გემოვნებით.
მომზადების წესი: კარტოფილი გარეცხეთ და 20 წუთის განმავლობაში მარილიან წყალში მოხარშეთ კანიანად. შემდეგ გადაავლეთ ცივი წყალი და კანი გააცალეთ. ცხელ-ცხელი კარტოფილი დაჭყლიტეთ, დაუმატეთ მარილი, მანანის ბურღული, პარმეზანი, კვერცხი, კარტოფილის სახამებელი, ჯავზი და კარგად აზილეთ.
მოამზადეთ გულსართი: მწვანილი წვრილად დაკეპეთ. ასევე დაკეპეთ თხილი და კედრის კაკალი. შეურიეთ ყველი, მწვანილი, მარილი და პილპილი. კარტოფილის ცომი გააბრტყელეთ ფქვილმოყრილ დაფაზე, ზედ გადაანაწილეთ გულსართი და ფრთხილად გადაახვიეთ. გადაიტანეთ ტილოზე, გაახვიეთ და ბოლოები ძაფით შეკარით. მოგრძო ფორმის მაღალ ტაფაში ან ქვაბში აადუღეთ წყალი, ჩაყარეთ 1 სადილის კოვზი მარილი და შიგ მოათავსეთ ტილოში გახვეული კარტოფილის რულეტი ისე, რომ წყალმა დაფაროს. ხარშეთ დაბალ ცეცხლზე 45 წუთის განმავლობაში. პომიდვრები ოთხად გაჭერით და თესლი ამოუღეთ. შემდეგ წვრილად დაჭერით, დაუმატეთ დაჭრილი მწვანილი, მარილი, შაქარი, ძმარი, პილპილი და წვრილად დაჭრილი ხახვი. ცალკე გაადნეთ კარაქი. ოხრახუში დაკეპეთ. რულეტი წყლიდან ამოიღეთ, გახსენით და დაჭერით, ზემოდან კი გამდნარი კარაქი მოასხით და ოხრახუში მოაყარეთ. მიირთვით პომიდვრის სალსასთან ერთად.