კითხვა: რამდენჯერ შეიძლება ხატების კურთხევა და როდის?
პასუხი: ხატები მღვდლისგან იკურთხება ერთხელ, მათი შექმნის ან მათი შეძენის შემდეგ. ასევე, შესაძლებელია მათი კურთხევა რესტავრაციის შემდეგ, თუ ხატს იერსახე დაკარგული ჰქონდა.
კითხვა: რატომ უნდა იყოს ჩვენი კეთილი საქმეები დაფარული?
პასუხი: იმიტომ, რომ ხალხისთვის მათი გამხელა, მათზე ზეციურ მისაგებელს აუქმებს. წმინდა თეოფანე დაყუდებული წერს: „რამდენადაც შეგიძლიათ, დაფარეთ თქვენი სულიერი ცხოვრებისეული საქმენი და ნურც გამომეტყველებით, ნურც საუბარში და ნურც სხვა მხრივ, ნუ გაამხელთ მათ“.
კითხვა: მაქვს პატარა მიწის ნაკვეთი, რომელზე მუშაობასაც მხოლოდ შაბათ-კვირას ვახერხებ. როგორც ვიცი, წმინდა წერილი გვიკრძალავს უქმე დღეებში მუშაობას. როგორ მოვიქცე?
პასუხი: თუ სხვა გამოსავალი არ გაქვთ, ეცადეთ, საღამოს ლოცვისა და დილის წირვის დროს არ იმუშაოთ.
კითხვა: როგორ უყურებს ეკლესია მეორედ დაქორწინებას, მეუღლის გარდაცვალების შემთხვევაში?
პასუხი: ეკლესია ასეთ კავშირს იწყნარებს – მეუღლის გარდაცვალების შემთხვევაში მეორედ დაქორწინება ღვთის გმობა არ არის, პირიქით, ის აარიდებს ადამიანს მრუშობის ცოდვას.
კითხვა: უნდა მივცეთ თუ არა შენიშვნა ადამიანს, ვინც ხმამაღალი ლაპარაკით ან გალობით ხელს უშლის მღვდელმსახურებას?
პასუხი: წმინდა იოანე ოქროპირი ამის უფლებას აძლევს თვით პატარა ბიჭუნასაც კი.