კითხვა: ჩვენ გვერდით არიან სხვადასხვა გზით გამდიდრებული ადამიანები. შეიძლება თუ არა „სულით გლახაკი“ იყოს მდიდარი და როგორ უნდა მოიქცეს მდიდარი, რომ სული არ წარიწყმიდოს?
პასუხი: მდიდრებსაც შეუძლიათ, იყვნენ „გლახაკნი სულითა“, თუ გაიაზრებენ, რომ ხილული სიმდიდრე წარმავალია და ის ვერ შეცვლის სულიერ სიკეთეს.
კითხვა: მინდა, რომ ჩემი მოზარდი შვილი დიდ დროს ატარებდეს ეკლესიაში, ისწავლოს ლოცვები, ფსალმუნები, ახლოს გაეცნოს ეკლესიურ ცხოვრებას, გახდეს სტიქაროსანი. როგორ მივაღწევ ამას?
პასუხი: მარტო თქვენი სურვილი არ კმარა. თქვენს შვილს თავად უნდა ჰქონდეს ამის სურვილი. ამას კი მაშინ მიაღწევთ, თუ თქვენი მაგალითი ექნება წინ – იქნებით ეკლესიური, ივლით ტაძარში, იტყვით აღსარებას და ეზიარებით. უმჯობესია, ბავშვი ადრეული ასაკიდან მიაჩვიონ ამ ყოველივეს და ეს მისი ცხოვრების წესი გახდეს. მთავარია, არაფერი დააძალოთ.
კითხვა: ყოველთვის სარწმუნოა თუ არა სინდისის ხმა?
პასუხი: აუცილებლად უნდა უსმინოთ სინდისის ხმას, რადგან სინდისის ხმით ხშირად ჩვენი მფარველი ანგელოზი მოგვმართავს. თუმცა, ეს ხმა რომ მართებულად აღვიქვათ, ის უფლის სიტყვას უნდა შევუთავსოთ.
კითხვა: როგორ ვამრავლოთ სიყვარული მოყვასისადმი?
პასუხი: მუდამ წარმოიდგინე შენი თავი მოყვასის ადგილას, ის კი – შენს ადგილას და ისე იმოქმედე.