ანუ ვინ უნდა გაწყალებოდა დედას მუცელში 

ის, რომ კაპიტალიზმი ყარს და დასავლეთი ბოროტების ბუდეა, რუსეთის მოქალაქეს დედის რძესავით აქვს შეთვისებული, მაგრამ ახლა უკვე ისიც შევიტყვეთ, რომ ამ კონტექსტში „დუმის“ საგარეო ურთიერთობათა კომიტეტის თავმჯდომარე სტალინის გადაწყვეტილებებსაც იწუნებს. ამჯერად აი, იმას, გაეროს შტაბ-ბინის ნიუ-იორკში განთავსებაზე თანხმობის შესახებ.
ბ-ნი პუშკოვი უბნობს, რომ ეს გადაწყვეტილება იოსებმა ფრანკლინთან (რუზველტთან) ახლო ურთიერთობის გამო მიიღოო და, მისი აზრით, შტაბ-ბინა ნეიტრალური სახელმწიფოს ტერიტორიაზე უნდა განთავსდეს.
და განა მოსაზრება ვაშლივით ზემოდან დაეცა, საქმე გაცილებით პროზაულადაა: დასავლური სანქციების გათვალისწინებით, რუსეთის არცთუ მცირე პატიოსან გვამ მოქალაქეს აშშ ვიზების გაცემაზე, ანუ ქვეყანაში შეშვებაზე უარს ეუბნება.
ამიტომაც, ამ უხერხულობის გასანეიტრალებლად,  რფ-დან უკვე მიმართეს გაეროს გენმდივანს შტაბ-ბინის ნეიტრალურ ტერიტორიაზე, სახელდობრ, შვეიცარიაში გადატანის ინიციატივით.
ჩვენ არ ვიცით, რა გადაწყვეტილებას მიიღებს ბ-ნი პან გი მუნი, თუმცა, თუ ჩრდილოეთში სტალინის მიერ მიღებული გადაწყვეტილებები შეცდომად მიაჩნიათ, შეუძლიათ, მისი მემკვიდრეობისგან სრულადაც გათავისუფლდნენ, მათ შორის, სტალინის მეთოდებით მართვის სტილისგან.
ოღონდ, მეორე მხრივ, ისიც ფაქტია, დედას რომ გაწყალებოდა მუცელში, ჩვენც დავისვენებდით და დანარჩენი დედამიწაც.