ბეკონის, სოკოსა და მაკარონის სალათა – მის თიკასგან
ძალიან მიყვარს ქართული და ბერძნული სამზარეულო და ვცდილობ, ამ ქვეყნებისთვის დამახასიათებელი ტრადიციული კერძები მოვამზადო. თუმცა, როგორი მზარეული ვარ, ეს მათ უნდა თქვან, ვინც ჩემ მიერ მომზადებულ კერძებს მიირთმევს. ასევე, მიყვარს სამზარეულოში ექსპერიმენტების ჩატარება და ადვილად მოსამზადებელი საჭმლის გაკეთება. ომლეტით დაწყებული, ელარჯითა და საცივით დამთავრებული, ყველაფერი ჩემი ხელით მაქვს გაკეთებული. ახლა კი შემოგთავაზებთ ბეკონის, სოკოსა და მაკარონის სალათას, რომელიც ძალიან გემრიელი და ნოყიერია.
საჭირო ინგრედიენტები: 200 გრამი „პასტა” მაკარონი, 150 გრამი სოკო, 1 ცალი ბულგარული წიწაკა, 150 გრამი პრასი, 100 გრამი ბეკონი, 150 მილილიტრი რძე, 2 ცალი კვერცხი, 3 ღერი ახალი ან ხმელი ბეგქონდარა, ცოტაოდენი ზეთი, მარილი და ახალდაფქული პილპილი – გემოვნებით.
მომზადების წესი: „პასტა” მოხარშეთ მდუღარე მარილიან წყალში და გადაწურეთ. სოკოები შუა-შუა, წიწაკა – კუბიკებად, პრასი კი სქელ რგოლებად დაჭერით. ბეკონი შუა-შუა გაჭერით და გახურებულ ტაფაზე ოდნავ შებრაწეთ, შემდეგ ამოიღეთ და დასაწრეტად ქაღალდის ხელსახოცზე დააწყვეთ. დაჭრილი ბოსტნეული და სოკო ზეთში მოშუშეთ, მოაყარეთ მარილი და პილპილი. კვერცხი და რძე ათქვიფეთ, დაუმატეთ მარილი და პილპილი, შემდეგ – წვრილად დაკეპილი ან დაფქული ბეგქონდარა. „პასტა” ბოსტნეულთან ერთად მოათავსეთ ტაფაში. ზემოდან მოასხით რძისა და კვერცხის ნარევი და 12-15 წუთი დადგით საშუალო ცეცხლზე, თავდახურული. ძალიან ისიამოვნებთ.