გოგირდის წყლების გამაჯანსაღებელ ცენტრ  „ჯორჯიან სპაში,” კავკასიის მსოფლიო ფედერაციისა და სპორტული კლუბის – „რეკორდის“ ორგანიზებით, თოთხმეტგზის გინესის რეკორდსმენმა ეტიბარ ელჩიევ-ბუდაღლმა ორი მსოფლიო რეკორდი დაამყარა: პირველ შემთხვევაში, ბიოენერგიისა და მაგნიტიზმის მეშვეობით მან სხეულზე 20-კილოგრამიანი რკინა მიიკრა, რომელზეც  60-კილოგრამიანი ადამიანი იჯდა; ასევე, რკინაზე თოკით ჩაბმული იყო „ნისანის“ ფირმის ორი ავტომობილი (თითოეულის წონა – 1 100 კილოგრამი). ეტიბარმა შეძლო და ეს სიმძიმეები ათ მეტრზე გადაადგილა. ასევე ბიოენერგიისა და მაგნიტიზმის წყალობით მოხსნა მან მეორე რეკორდიც: ამჯერად სხეულზე 20-კილოგრამიანი რკინა მიიკრა, რომელზეც 17 ცალი კრამიტი იყო დაწყობილი. კრამიტები სათითაოდ ჩაქუჩით დაამტვრიეს, რეკორდსმენს კი რკინა სხეულიდან არ ჩამოვარდნია.
ასევე, შპს „ასპრა ჯგუფის“ ფიტნეს-კლუბში, მსოფლიოს ოთხგზის რეკორდსმენმა გოჩა კეკიშვილმა მეხუთე მსოფლიო რეკორდი დაამყარა: ის 30 წუთის განმავლობაში ორძელზე 656-ჯერ აიზიდა და ინგლისელი სპორტსმენის შედეგი (540) მნიშვნელოვნად გააუმჯობესა.