კითხვა: ვარ 55 წლის. ბოლო დროს ხშირად ვხდები ავად. მინდა, თავი დავანებო მუშაობას და დავინიშნო პენსია. გთხოვთ, განმიმარტოთ, როგორ დავადგინო ინვალიდობის ჯგუფი და რა თანხა დამენიშნება პენსიად?

პასუხი: გაცნობებთ, რომ სოციალური პაკეტის დანიშვნის შესახებ განცხადება წარედგინება საქართველოს შრომის, ჯანმრთელობისა და სოციალური დაცვის სამინისტროს კონტროლს დაქვემდებარებული საჯარო სამართლის იურიდიულ პირს – სოციალური მომსახურების  სააგენტოს ნებისმიერ ტერიტორიულ ერთეულს, მიუხედავად მაძიებლის რეგისტრაციის ადგილისა. განცხადებას თან უნდა დაერთოს შემდეგი საბუთები: მაძიებლის პირადობის დამადასტურებელი მოწმობა; შეზღუდული შესაძლებლობის სტატუსის დადგენის გამო სოციალური პაკეტის დანიშვნის შემთხვევაში – შესაბამისი სამედიცინო დაწესებულების მიერ გაცემული სამედიცინო-სოციალური ექსპერტიზის შემოწმების აქტის ამონაწერი. ზოგადად, შეზღუდული შესაძლებლობის სტატუსის მქონე პირებს  პენსია დაენიშნებათ 100 ლარის ოდენობით.

კითხვა: დაწესებულების გაუმართავი შრომის პირობების გამო მივიღე საწარმოო ტრავმა. მჭირდება გადაუდებელი მკურნალობა, რასაც დაწესებულების ადმინისტრაცია თავს არიდებს. გთხოვთ, მაცნობოთ, ეკისრება თუ არა დამსაქმებელს პასუხისმგებლობა ასეთ შემთხვევაში?

პასუხი: გაცნობებთ, რომ დამსაქმებელი ვალდებულია სრულად აუნაზღაუროს დასაქმებულს სამუშაოს შესრულებასთან დაკავშირებული, ჯანმრთელობის მდგომარეობის გაუარესებით მიყენებული ზიანი და აუცილებელი მკურნალობის ხარჯები.  შესაბამისად, მოცემულ შემთხვევაში, დაწესებულება ვალდებულია, გასწიოს მკურნალობის ხარჯები. 

კითხვა: ჩემი საცხოვრებელი სახლის პრივატიზება გავაკეთე გასული საუკუნის 90­იან წლებში, მაგრამ დარეგისტრირებული არ მაქვს საჯარო რეესტრში. რა საბუთები უნდა წარვადგინო და რა თანხა დამიჯდება რეგისტრაცია?

პასუხი: გაცნობებთ, რომ საკუთრების უფლების რეგისტრაციისთვის პრივატიზებულ უძრავ ნივთთან დაკავშირებით უნდა მიმართოთ იუსტიციის სახლს ან საჯარო რეესტრის ეროვნული სააგენტოს ტერიტორიულ სამსახურს და თან იქონიოთ შემდეგი დოკუმენტები: განცხადება (ელექტრონული განცხადება ივსება საბუთების მიმღები ოპერატორის მიერ); თქვენი პირადობის დამადასტურებელი და საკუთრების უფლების დამადატურებელი მოწმობები; პრივატიზების ხელშეკრულება. რაც შეეხება რეგისტრაციის საფასურს: რეგისტრაციის საფასური 4 სამუშაო დღეში შეადგენს 50 ლარს, 1 სამუშაო დღეში – 150 ლარს, ხოლო იმავე დღეს – 200 ლარს.

კითხვა:  მოვალის ყადაღადადებული ქონება გაიტანეს აუქციონზე გასაყიდად. აუქციონის შედეგად ქონება დაუბრუნდა გადამხდელს (მოვალეს), ისე, რომ მას ქონების ფული არ გადაუხდია. კანონიერია თუ არა ასეთი გადაწყვეტილება?

პასუხი: კითხვა არასრულყოფილია, თუმცა, ქონება, რომელშიც თანხა არ არის გადახდილი, ვერ ჩაითვლება  კანონიერად შეძენილ ქონებად.