¹2 – ცილოვანი დიეტა

როგორც წინა ნომერში შეგპირდით, დღეს გთავაზობთ „3 ექსპრეს-დიეტის“ მეორე ვარიანტს, რომელსაც პირობითად „ცილოვანი დიეტა“ ვუწოდეთ, რადგან მასში შემავალი პროდუქტების უმრავლესობა ჭარბად შეიცავს ცილებს.

წინა დიეტისგან განსხვავებით, რომელიც 7 დღეს გრძელდებოდა, ცილოვანი დიეტის დაცვა 10 დღის განმავლობაში მოგიწევთ და 3-დან 5 კილოგრამამდე დაიკლებთ.

ცილოვანი დიეტის დროს თითოეულ ჯერზე უნდა მიირთვათ მცირე რაოდენობის საკვები და, რაც შეიძლება ხშირად.

პირველ, მესამე, მეხუთე, მეშვიდე და მეცხრე დღეს საუზმისთვის შეგიძლიათ შეარჩიოთ თქვენთვის სასურველი ვარიანტი: 100 გრამი ხაჭო და 1 კვერცხის ომლეტი ან 1 ჩაის ჭიქა უცხიმო კეფირი (ან მაწონი) და 1 ცალი მოხარშული კვერცხი. ამ ულუფის ნახევარი მიირთვით დილით, გაღვიძებისთანავე, ნახევარი კი – სამსახურში წასვლის წინ (თუ არ მუშაობთ – 1-2 საათის შემდეგ).

ლანჩი – ბოსტნეულის სალათა, 1 ჩაის ჭიქა გაზგასული მინერალური წყალი.

სადილი – 250 გრამი გამომცხვარი ან მოხარშული თევზი; 1 საათის შემდეგ კი – 100 გრამი მოხარშული ბრინჯი ან წიწიბურა (უცხიმოდ და ძალიან ცოტა მარილით) და 1 ჩაის ჭიქა ახალგამოწურული ხილის წვენი (უშაქროდ, ცოტა წყალში გაზავებული).

სამხარი – მწვანე სალათა, 1 ცალი მოხარშული კვერცხი და 100 გრამი კრევეტები.

ვახშამი – 1 მოზრდილი ნაჭერი საქონლის ხორცის სტეიკი (მჭლე) და ბოსტნეულის სალათა (ბოსტნეული თქვენი სურვილისამებრ შეარჩიეთ).

მეორე, მეოთხე, მეექვსე, მერვე და მეათე დღეს:

საუზმე – 1 ჩაის ჭიქა კეფირში დამბალი 2 სადილის კოვზი „ჰერკულესი“; 1 ნაჭერი ტოსტი და 1 ნაჭერი უცხიმო ყველი.

ლანჩი – სენდვიჩი მოხარშული უცხიმო თევზითა და მწვანილით ან 400 გრამი უცხიმო კეფირი.

სადილი – უცხიმო საქონლის ხორცის სტეიკი (1 ნაჭერი) და კიტრისა და პომიდვრის ან გრილზე მომზადებული ბოსტნეულის სალათა.

სამხარი – 1 ჩაის ჭიქა უცხიმო იოგურტი და 2 ცალი კიტრის სალათა ნიახურით, ოხრახუშითა და კამით (უმარილოდ); შეგიძლიათ, კიტრი ჩაანაცვლოთ 100 გრამი უცხიმო და უმარილო ყველით.

ვახშამი – 150 გრამი გამომცხვარი უცხიმო თევზი ან ამდენივე მოხარშული ქათმის ან ინდაურის ფილე; 1 ჩაის ჭიქა გაზგასული მინერალური წყალი.

შუალედებში შეგიძლიათ მიირთვათ 150-200 გრამი ნებისმიერი ხილი.

წყალი, ტრადიციულად, დღეში 2 ლიტრამდე.