მარტივი და სასარგებლო
ჯადოსნური სარკე – ჩარჩო
შეგიძლიათ, წარმოიდგინოთ, რომ კვერცხის ნაჭუჭისგან ორიგინალური, ლამაზი ჩარჩოს დამზადება შეიძლება? ჯერ კარგად დაათვალიერეთ ფოტოები და შეუდექით საქმეს: აიღეთ მრგვალი ან ოთხკუთხედი მოზრდილი მუყაოს ნაჭერი და მასზე, შუაზე ოდნავ ზემოთ, ჯერ ერთი დიდი წრეწირი შემოხაზეთ და გამოჭერით, შემდეგ კი, დარჩენილ თავისუფალ ადგილზე, შემოხაზეთ რამდენიმე სხვადასხვა ზომის წრე და ისინიც ამოჭერით. წაუსვით წებო და მთლიანად დაფარეთ წინასწარ დამტვრეული მშრალი ნაჭუჭით. შეღებეთ თქვენთვის სასურველი ფერის ნებისმიერი საღებავით, წრეებს ნაპირზე ლამაზი კანტი ან წნული შემოავლეთ და მთლიანად გადაუსვით ვერცხლისფერი ან ოქროსფერი ბრინჯაოს საღებავი („ბრონზა”); შემდეგ უკანა მხრიდან მეორე, იმავე ზომის მუყაო დააკარით და ჩამოსაკიდიც გაუკეთეთ, მანამდე კი შუაში ფოტოები ან სარკეები ჩაუმაგრეთ.
ჩანთა – ძველი შარვლიდან
დაგჭირდებათ ძველი შარვლის ერთი ტოტი და ფერადი ქსოვილი. დახედეთ სურათებს: შარვლის ტოტს მოაჭერით სათავე (სათავე ჩანთის „ყურად“ გამოგადგებათ). აიღეთ შარვლის ტოტის ის მხარე, რომელზეც ჯიბეა მიკერებული, ანუ, უკანა მხარე და გაუკეთეთ ფერადი ქსოვილის სარჩული. ასეთივე სარჩული გაუკეთეთ „ყურსაც“. რაც უფრო ხასხასა იქნება ქსოვილი, მით უფრო ლამაზი გამოვა თქვენი ჩანთა. გადაკეცეთ სამად, ისე, რომ ჯიბიანი მხარე გადმოეფაროს და გვერდებზე ჩაკერეთ. მიაკერეთ ყურიც.