10 მაისს კინოთეატრ „ამირანში” ახალი ქართული ფილმის – „ნაწილების” პრემიერა, რომელიც „ვერსიო ფილმსმა” წარმოგვიდგინა, წარმატებულად შედგა. ფილმის რეჟისორია ნიკოლოზ ჯავახიშვილი; აღმასრულებელი პროდიუსერი – ოთარ ჭუმბურიძე; პროდიუსერები – ნოდარ მამულაშვილი, კონსტანტინე გაბაშვილი, დავით ქაცარავა; სცენარისტები – ნიკოლოზ ჯავახიშვილი, ნინო კელაურიძე; დამდგმელი ოპერატორი – იგორ ტოჩილნიკოვი; დამდგმელი მხატვრები – კაკადუ, ნიკოლოზ ჯავახიშვილი; მუსიკა – ნიკა მაჩაიძე, ნატალია ბერიძე. რაც შეეხება მსახიობებს, ესენი არიან: ნიკა თავაძე, ნანკა კალატოზიშვილი, ლაშა ონიანი, გიორგი კალანდაძე, ნოდარ მამულაშვილი, გიორგი გურგულია, დავით ქაცარავა და მარინა ჯანაშია. დრამა, მისტიკა, სამეცნიერო ფანტასტიკა – ეს არის ფილმის ჟანრი, რომელიც  საინტერესო სანახავია, არაერთ კითხვას ბადებს და ცოტათი გძაბავს კიდეც. მოკლედ, „სპირალის” შემდეგ, ეს არის ამ ჟანრში გადაღებული პირველი ფილმი, რომლის გატანასაც საპროდიუსერო ჯგუფი უცხოეთში გეგმავს. თუმცა, მანამდე ქართველ მაყურებელს მისი ნახვა თბილისის კინოთეატრებში შეუძლია.