უაილდი: ზნეობა პოეზიაა, ჩვენ მას ვიყენებთ იმ ადამიანთა წინააღმდეგ, რომელნიც ჩვენთვის არასასიამოვნონი არიან.

ვედეკინდი: ზნეობა მე წარმომიდგენია, როგორც რეალური ნაყოფი ორი მოჩვენებითი სიდიდისა. ეს მოჩვენებითი სიდიდეებია მოვალეობა და სურვილი.

ფიშერი: ზნეობრივი ყოველთვის თავისთავად გასაგებია.

დემოკრიტე: თუ ზომას გადახვალ, ყველაზე დიდი სიამოვნება ყველაზე დიდ უსიამოვნებად გადაგექცევა.

ლინკოლნი: მსოფლიოს დღემდე ვერ უპოვნია კარგი დეფინიცია სიტყვისა „თავისუფლება“.

ლობერგერი: თავისუფალი ის არის, ვისაც ის სურს, რაც ევალება.

სენეკა: რასაც არ კრძალავს კანონი, კრძალავს წესიერება.

ვან დაიკი: კულტურა არის ჩვეულება, რომ კმაყოფილებას გგვრიდეს ყველაზე უკეთესი რამ და თან იცოდე, თუ რატომ.

ჰიუგო: ვინც ძერას დაშავებული ფრთა მოურჩინა, ის პასუხს აგებს მისი კლანჭების მოქმედებაზე.

კუდცუსი: დაბერება იმას ნიშნავს, რომ საკუთარი თავის ატანას ეჩვევი.

***

შიში არის ხარკი, რომელსაც მოძრაობის უნარისთვის ვიხდით. მცენარეებსა და ქვებს არავითარი შიში არა აქვთ.

ჰიუჩესონი: სიბრძნე ნიშნავს მისწრაფებას უკეთესი მიზნისკენ უკეთესი საშუალებებით.

ანიტა: გულკეთილობა სისუსტეა, სიკეთე კი – ძალა.

ზოიმე: ვისაც სიკვდილის ეშინია, მან სიცოცხლე დაკარგა.

ფულერი: ლამაზ სახეს კეთილი სახელი სჯობია.

შექსპირი: სისულელე ბრძენებს უფრო ჰრგებს, ვიდრე სიბრძნე სულელებს.

ბუასტი: სულელთან ჭკვიანურად ლაპარაკი იგივეა, რაც ბრმისთვის – სანთელი.

ეზოპე: ღარიბ კაცს მუდამ ცუდი დღე ელის, თუ გვერდით მისი ბატონი სახლობს.

კირკეგარდი: სიძულვილი სიყვარულია, რომელიც დამარცხდა.

ლაროშფუკო: სიძუნწე უფრო შორს არის მომჭირნეობისგან, ვიდრე თვით მფლანგველობა.

ბირსი: სიძუნწეა, უღირსად ცდილობდე, ის შეინარჩუნო, რაც მრავალ დამსახურებულ ადამიანს სურს იქონიოს.

ბრიტენი: სწავლა ჰგავს ნიჩბის მოსმას დინების საწინააღმდეგოდ. როგორც კი გაჩერდები, დინება უკან წაგიღებს.

შილერი: უბრალოება მოწიფულობის შედეგია.

ტოლსტოი: თავის გათავისუფლება შრომისგან არის დანაშაული.

ესქილე: სახარბიელო როდია მისი ბედი, ვისიც არავის შურს.

ჩაპეკი: ყველაზე დიდი უბედურება ცივილიზაციისა ის არის, რომ მისი ნაყოფია სწავლული ბრიყვი.

ნიცშე: ცილისწამებანი სხვათა დაავადებებია, რომელიც ტანზე ამოგაყრის.

როსტანი: შეიძლება წარმოიდგინო მხოლოდ ქალებისგან შემდგარი კაცობრიობა, მხოლოდ კაცებისგან შემდგარს კი ვერ წარმოიდგენ.