ანუ, ის აფრენს…

რაკი ფანტაზია უსაზღვროა (ან, იქნებ, სულ სხვა, ამაღლებულ თუ პროზაულ მიზეზთა გამო), გაირკვა, რომ ამიერიდან და სამარადჟამოდ რფ-ის პრ. ვლადიმირ პუტინი ვერტმფრენით იმგზავრებს (ანუ, სწორ მიწაზე საპრეზიდენტო კორტეჟით გადაადგილების ნაცვლად, იფრენს).

როგორც შევიტყვეთ, კრემლში არათუ უკვე მომზადებულია სპეციალური მოედანი, მასზე კიდეც გამოსცადეს აფრენა-დაფრენის სხვადასხვა რეჟიმი. სპეციალისტებს ყველა ნიუანსი გაუთვალისწინებიათ, რომ ხშირმა გაფრენებმა კრემლის ისტორიული შენობები არ დააზიანოს. .

თურმე, აქამომდე რფ-ის საპრეზიდენტო ვერტმფრენი ივანოვის მოედანზე ჯდებოდა, რაც ივანე დიდის სამრეკლოს აზიანებდაო. ამჯერად კი ასაფრენი მოედანი ტაინიცკის ბაღში განუთავსებიათ.

პრ. პუტინსა და პრ.-მინისტრ მედვედევს ვერტმფრენებით გადაადგილების გადაწყვეტილება მოქალაქეების საკეთილდღეოდ მიუღიათ: ჩვენ თუკი ვიფრენთ, დედამიწას, სახელდობრ, რფ-ის დედაქალაქს, კორტეჟის მიერ შექმნილი საცობები აღარ შეაწუხებსო. .

თუ გავითვალისწინებთ, რომ ჩვენი მას, თუ მათი ჩვენსას პერმანენტულად ჰბაძავდა, შეიძლება, ითქვას, გაგვიმართლა, რაკი ჩვენსას ვადა ოქტომბრის ბოლომდე დარჩა.