კითხვა: ვარ 26 წლის. 5 თვეა, ასე მგონია რაღაც მახრჩობს. ფარისებრი გამოვიკვლიე, ყველაფერი ნორმაშია. რომელ სპეციალისტს მივმართო, როგორ ვიმკურნალო?

პასუხი: უნდა მიმართოთ ყელ-ყურის ექიმს და თერაპევტს. თუ ყვლაფერი ნორმაშია, ფსიქოთერაპევტს – შეიძლება ასე ვეგეტატიური დისფუნქციის სინდრომი ვლინდებოდეს. 

კითხვა: რისგან შეიძლება იყოს განავალი მუქი წითელი ფერის?

პასუხი:  შესაძლოა მიღებული საკვების შედეგად (ჭარხალი), ან ხანგრძლივი შეკრულობის შემდეგ (შეიძლება ბუასილი გაქვთ). არ არის გამორიცხული, სხვა მიზეზებიც. დიაგნოზის დასაზუსტებლად მიმართეთ პროქტოლოგს ან გასტროენტეროლოგს.

კითხვა: ვარ 37 წლის ქალი, 4 დღეა, მაქვს ძალიან  დაბალი წნევა (80/40). საშიშია, როგორ მოვიქცე? ვსვამ მაგარ ტკბილ ჩაის + კონიაკი ჩაიში. წნევა ცოტა ზემოთ იწევს (100/60), მაგრამ სისუსტე და დაღლილობა რჩება.

პასუხი:  ხანგრძლივი ჰიპოტენზიის (დაბალი წნევის) დროს, რომელსაც სისუსტე, დაღლილობა ახლავს თან, გირჩევთ, შემდეგ გამოკვლევას: სისხლის საერთო ანალიზი; თირკმელებისა და თირკმელზედა ჯირკვლების ექოსკოპია; კორტიზოლი სისხლში; სისხლის ბიოქიმიური ანალიზი (შაქარი, კალიუმი საერთო ცილა, რკინა); ელექტროკარდიოგრამა და გულის ექოსკოპია; თერაპევტის კონსულტაცია.

კითხვა: მაწუხებს შარდის ბუშტი, სულ მცივა შარდის ბუშტის ადგილას. მაქვს ხშირი შარდვა, თითქმის ყოველ 2 საათში. რას მირჩევთ, ვის მივმართო?

პასუხი:  დროული და ეფექტური მკურნალობის მიზნით უროლოგს უნდა მიმართოთ.

კითხვა: შეიძლება თუ არა პროსტატა უშვილობის მიზეზი იყოს?

პასუხი: პროსტატა წინამდებარე ჯირკვალია, მისი პათოლოგია, მაგალითად, ინფექციური პროსტატიტი, შეიძლება, იყოს უშვილობის მიზეზი. მიმართეთ უროლოგს.

კითხვა: მკურნალობამდე ჯობია, პაპ-ტესტისა და კოლპოსკოპიის გაკეთება, თუ მკურნალობის შემდეგ (ნაცხის საერთო ანალიზის მიხედვით მაქვს ანთებითი პროცესი)?

პასუხი: მკურნალობამდე გესაჭიროებათ ნაცხის ბაქტერიოლოგიური ანალიზიც.  რაც შეეხება პაპ-ტესტსა და კოლპოსკოპიას, ჩაიტარეთ მკურნალობის შემდეგ. მკურნალობის სპეციფიკას საზღვრავს გინეკოლოგი.    

კითხვა: ჩემს ქმარს მეტეორიზმი აქვს. უჩივის შებერილობის შეგრძნებას კუჭისა და ნაწლავების მიდამოებში. შეწუხებულია თვითონაც და ოჯახის წევრებიც. როგორ მიიღოს ესპუმიზანი?

პასუხი: ყველა პრეპარატს გააჩნია მიღების სტანდარტული დოზირება. ესპუმიზანისთვის – 1-2 კაფსულა ყოველი ჭამის შემდეგ და კიდევ ერთხელ ძილის წინ. ამის მიუხედავად, ამ პრეპარატის დანიშვნა ინდივიდუალური დოზირებითაც შეიძლება. არ იქნებოდა ასევე ურიგო, გამოკვლევის ჩატარება და ასეთი მეტეორიზმის მიზეზის დადგენა.

კითხვა: შეიძლება თუ არა სოლარიუმში გარუჯვა მენსტრუაციის დროს?

პასუხი:  შეიძლება, მაგრამ უნდა გაითვალისწინოთ, რომ ამ პროცედურის შემდეგ მენსტრუაცია მოჭარბებული იქნება.