გასულ კვირას „სკაი ბარში” აჩიკო მეფარიძე მონატრებული თაყვანისმცემლების წინაშე ახალი პროექტით წარდგა. „აჩი და „ქომფანი” – ასე ჰქვია პროექტს, რომლის ფარგლებში აჩი მეფარიძე და რუსეთში გაზრდილი, წარმოშობით ქართველი ორი გოგონა კონცერტებს მართავენ სხვადასხვა კლუბში. ეს იყო ნოსტალგიური საღამო, სადაც აჩიკო თავის მეგობრებს, თბილისურ პუბლიკას მიეფერა და თან მოსკოვში გამგზავრების წინ დაემშვიდობა. კონცერტზე ცნობილი მსოფლიო ჰიტების ახლებური ინტერპრეტაციები შემოგვთავაზეს. ემოციური იყო მომენტი, როდესაც მომღერალმა თავისი ყველაზე ცნობილი სიმღერები შეასრულა. „სკაიში“ შეკრებილ სტუმრებს საცეკვაო მოედანი, პრაქტიკულად, არ დაუტოვებიათ. გვიან ღამით აჩიკო სტუმრებს დაემშვიდობა, დილით კი ის უკვე რუსეთისკენ მიმავალ თვითმფრინავში იჯდა.